Візыт прэзыдэнткі Грузіі Саламэ Зурабішвілі ў Беларусь будзе перапынены, яна вернецца ў Тбілісі з прычыны акцыі пратэсту, паведамляе грузінскае агенцтва Interpressnews.
Прэзыдэнтка Грузіі прыбыла ў Беларусь у чацьвер. Паводле зьвестак ТАСС, сустрэча зь беларускім прэм’ерам была заплянаваная на раніцу 21 чэрвеня, але не адбылася. Зурабішвілі таксама мусіла прысутнічаць на цырымоніі адкрыцьця ІІ Эўрапейскіх гульняў у якасьці ганаровай госьці, але гэтыя пляны давялося скасаваць.
БелТА паведаміла а 10-й гадзіне, што сустрэча з Аляксандрам Лукашэнкам ўжо адбылася.
«Даводзіцца зьяжджаць, але заўзець буду на адлегласьці, — перадае БелТА словы Саламэ Зурабішвілі. — Цяпер у Грузіі напружаная сытуацыя, таму я палічыла абавязковым быць там. Бо калі ў краіне адбываецца нешта, кіраўнік дзяржавы мусіць быць на месцы. Таму яшчэ раз прабачце, але я павінна зьехаць і быць побач са сваім народам».
«Нам не абыякава, якая сытуацыя ў Грузіі, — сказаў ёй Аляксандар Лукашэнка. — Ваш народ перажыў шмат складаных момантаў пасьля распаду Савецкага Саюзу. Вы заўсёды годна выходзілі са складаных сытуацыяў. І цяперашняя сытуацыя няпростая ў Грузіі, як і ў іншых рэспубліках, але мы людзі мужныя і знойдзем выйсьце з самых цяжкіх сытуацыяў».
15 жорсткіх фатаздымкаў з пратэстаў у Тбілісі
На Facebook прэзыдэнтка заклікала грамадзянаў Грузіі да спакою, заявіла, што «годнасьць краіны была парушаная», але гэта не апраўдвае «антыдзяржаўных дзеяньняў» у час антырасейскіх пратэстаў. Расею яна назвала «нашым ворагам і акупантам».
