Выданьне Time апублікавала расьсьледаваньне аб нерухомасьці сям’і прэзыдэнта Расеі Ўладзіміра Пуціна на адным з самых прэстыжных францускіх курортаў, Біярыцы.
Журналістам удалося знайсьці агентку па нерухомасьці Лярэн Вэбэр, якая ў 2012 годзе заключыла ўгоду аб куплі асабняка зь меркаваным зяцем Пуціна Кірылам Шамалавым і дачкой прэзыдэнта Расеі Кацярынай Ціханавай. Паводле словаў Вэбэр, яны асабіста заключалі ўгоду.
Згодна з запісам аб уласнасьці, атрыманых Time, пакупніком зьяўляецца Шамалаў, а прадаўцом — Генадзь Цімчанка, бізнэсовец з найбліжэйшага атачэньня Ўладзіміра Пуціна.
Лярэн Вэбэр таксама распавяла, што ў мінулым годзе тэлефанавала Шамалаву і пыталася ў яго, як рэагаваць на павышаную ўвагу да асабняка з боку журналістаў, на што той папрасіў агентку «нічога нікому не казаць».
Інфармацыю пра тое, што асабняк сапраўды належыць Шамалаву і Ціханавай, пацьвердзіла намесьніца мэра гораду Джасэлін Кастэньед. Таксама, паводле яе, «гараджане часта бачаць іх, калі яны гуляюць на рынку».
Яшчэ адна віла, якая належыць блізкім Пуціна, паводле дадзеных Time, знаходзіцца ў суседнім зь Біярыцам мястэчку Англет і цяпер рамантуецца. Згодна з зямельным рэестрам, уладальнікам вілы зьяўляецца пецярбурскі бізнэсовец Артур Ачарэтны — цяперашні муж былой жонкі прэзыдэнта Расеі Людмілы Пуцінай.
Расейскі консул у Біярыцы Аляксандр дэ Мілер дэ ля Сэрда распавёў, што былая жонка прэзыдэнта Расіі прыяжджала на курорт амаль кожны год — як да, гэтак і пасьля разводу. Спыняецца яна альбо ў адным з самых дарагіх гатэляў гораду, «Мірамар», альбо ў асабняку, які, як сфармуляваў консул, «належыць нашаму агульнаму сябру зь пецярбурскага атачэньня Пуціна».
Паводле дадзеных Time, сам Пуцін таксама любіў прыяжджаць у Біярыц. Улетку 1999 году менавіта падчас адпачынку з сям’ёй на гэтым курорце яму прыйшло «тэрміновае паведамленьне з Крамля» аб тым, што тагачасны прэзыдэнт Расеі Барыс Ельцын хоча бачыць яго сваім пераемнікам. Расейскі консул у Біярыцы таксама пацьвердзіў, што атачэньне Пуціна мае асаблівую прыхільнасьць да гэтага месца.
