Cуд у Днепрапятроўскай вобласьці Ўкраіны зацьвердзіў зьдзелку са сьледзтвам абвінавачаных у замаху на актывістку Кацярыну Гандзюк і прызначыў ім пакараньне, паведамляе «Украінская праўда». У ліпені 2018 году на яе быў зьдзейсьнены напад, яна памерла ад атрыманых траўмаў.
33-гадовая дэпутатка Хэрсонскага абласнога савету Гандзюк крытыкавала карумпаваных украінскіх палітыкаў і прадстаўнікоў сілавых структур. За замах на яе асуджаныя пяць чалавек, якія атрымалі ад 6,5 да 3 гадоў зьняволеньня.
Абвінавачаныя прызналі сваю віну і пайшлі на зьдзелку са сьледзтвам, пракуратура зьмяніла ім абвінавачаньне з забойства на наўмыснае нанясеньне цяжкіх цялесных пашкоджаньняў.
Заказчык злачынства на судовым працэсе названы ня быў. Сьмерць актывісткі выклікала вялікі грамадзкі розгалас ва Ўкраіне, у краіне праходзілі акцыі з патрабаваньнем раскрыць злачынства.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў