Аўтар сэрыялу «Чарнобыль» адкідае абвінавачваньні ў плягіяце

Аўтар сэрыялу «Чарнобыль» Крэйг Мэйзін абвяргае абвінавачваньні ўкраінскага драматурга Паўла Ар’е ў плягіяце. Напярэдадні украінец заявіў, што ў сэрыяле выкарыстоўвалі маналёг бабы Прысі зь ягонай п’есы «На пачатку і напрыканцы часоў».

«Не, я ніколі не чытаў твораў і ня бачыў нічога ад Паўла Ар’е, я таксама не чуў пра Бабу Прысю. Натхненьне для гэтай сцэны — гэта момант, апісаны ў "Галасах з Чарнобылю" (назва кнігі Сьвятланы Алексіевіч у перакладзе на ангельскую мову), калі жанчына працягвае даіць карову, а салдат — выліваць малако. Яе прамова, аднак, цалкам мая», — напісаў Мэйзін у Twitter.

На гэтым тыдні нобэлеўская ляўрэатка Сьвятлана Алексіевіч паведаміла Свабодзе, што дала згоду на выкарыстаньне яе твору «Чарнобыльская малітва» для стварэньня сэрыялу HBO «Чарнобыль». Паводле яе быў заключаны адпаведны кантракт.

Сюжэтная лінія з пажарным Васілём Ігнаценкам цалкам узятая зь кнігі Сьвятланы Алексіевіч. Ігнаценка, якога грае актор Адам Нагайціс, быў у ліку першых, хто прыбыў на тушэньне пажару на чацьвёртым энергаблёку ЧАЭС. У выніку атрымаў сьмяротную дозу радыяцыі і пакутліва памёр у Маскве праз пару тыдняў.

Гісторыя Ігнаценкі — адна з самых шчымлівых у сэрыяле. Сьвятлана Алексіевіч напісала яе паводле доўгіх размоваў з жонкай Людмілай (акторка Джэсі Баклі). У інтэрвію Адам Нагайціс сказаў, што дадатковай інфармацыі пра свайго героя знайсьці было немагчыма з той прычыны, што ў СССР усе зьвесткі пра іх была засакрэчаныя, і адзінай крыніцай была кніга Алексіевіч.

Сама Сьвятлана Алексіевіч, якая цяпер знаходзіцца ў Лісабоне, яшчэ не бачыла сэрыялу, але вельмі хоча яго паглядзець. Яна плянуе гэта зрабіць, калі вернецца бліжэйшым часам у Беларусь. Нобэлеўская ляўрэатка паабяцала падзяліцца ўражаньнямі са Свабодай.

Тым часам чэскае выданьне Lidovky.cz у публікацыі пра сэрыял «Чарнобыль» выказала здагадку наконт выдуманага пэрсанажу Ўльляны Хамюк: «Таксама магчыма, што стваральнікі такім чынам робяць камплімэнт пісьменьніцы Алексіевіч, паколькі Хамюк некалькі падобная на яе і таксама паходзіць зь Беларусі».

Амэрыканска-брытанскі міні-сэрыял «Чарнобыль» распавядае пра самую буйную тэхнагенную катастрофу XX стагодзьдзя — выбух на Чарнобыльскай АЭС.

«Чарнобыльская малітва. Хроніка прышласьці» — кніга нобэлеўскай ляўрэаткі, беларускай журналісткі і пісьменьніцы Сьвятланы Алексіевіч, прысьвечаная аварыі на Чарнобыльскай АЭС у 1986 годзе. Алексіевіч у наступныя пяць гадоў пасьля аварыі гутарыла зь пяцьцюстамі сьведкамі аварыі, у тым ліку пажарнымі, ліквідатарамі, палітыкамі, лекарамі, фізыкамі і звычайнымі грамадзянамі. Кніга апісвае псыхалягічную і асабістую трагедыю, якой стала Чарнобыльская аварыя, і дасьледуе ўражаньні людзей, і тое, як аварыя паўплывала на іх жыцьці.