Служба ўласнай бясьпекі МУС праводзіць службовы разбор па факце гібелі супрацоўніка МУС Яўгена Патаповіча ў Магілёве, паведаміў БелаПАН першы намесьнік міністра ўнутраных спраў Іван Падгрускі.
На пытаньне БелаПАН, ці ня лічыць ён, што МУС павінна папрасіць прабачэньня перад цыганамі, якіх масава затрымлівалі ў Магілёве пасьля сьмерці супрацоўніка ДАІ, Падгрускі адказаў: «Можа быць, і трэба. Ня ведаю, ці будзем».
Увечары 16 траўня ў Магілёве затрымалі каля сотні жыхароў двух цыганскіх раёнаў гораду: Чапаеўкі і Грабянёва. Жанчын адпусьцілі на наступную раніцу, а мужчын трымалі да нядзелі. Пасьля вызваленьня яны расказалі Свабодзе, што міліцыянты выпытвалі, хто з прадстаўнікоў цыганскай дыяспары датычны да забойства міліцыянта Яўгена Патаповіча. Пры затрыманьні і на допытах іх білі.
У Міністэрстве ўнутраных спраў сказалі, што «нічога ня ведаюць» пра сотню затрыманых цыганоў у Магілёве.
Паводле старшыні грамадзкага аб’яднаньня «Беларуская дыяспара цыганоў» Алега Казлоўскага, затрыманьні былі ня толькі ў Магілёве: да цыганоў прыходзілі міліцыянты ва ўсіх рэгіёнах Беларусі. Да самога старшыні дыяспары двойчы прыходзілі з нагоды забойства Яўгена Патаповіча.
«Яны паднялі ўсе сілы МУС, сказаў Казлоўскі. — У Калодзішчах быў аўтобус АМАПу. Затрымлівалі ў Віцебску, у Гомлі пагалоўна — па ўсёй краіне».
