Нацыянальнае антыкарупцыйнае бюро Ўкраіны адкрыла крымінальную вытворчасьць у дачыненьні да старшыні Вярхоўнай рады Андрэя Парубія па рашэньні суду ў Кіеве. Пра гэта паведамляе агенцтва УНІАН са спасылкай на прэс-службу ведамства.
Справа адкрыта паводле прыкметаў парушэньня двух артыкулаў Крымінальнага кодэксу Ўкраіны — аб нямэтавым выдаткоўваньні сродкаў і злоўжываньні ўладай. У чым абвінавачваюць палітыка — не паведамляецца.
«Грамадзкае тэлебачаньне» удакладняе, што ў канцы лютага антыкарупцыйнае ведамства атрымала па пошце заяву аб крымінальных злачынствах, якія мог зьдзейсьніць Парубій. Тады бюро ня стала адкрываць справу, але гэта было абскарджана ў судзе.
Прэс-сакратар Парубія Андрэй Кавалёў пісаў у фэйсбуку, што справа ня мае дачыненьня да карупцыі, а заява напісаная нязгодным са сваім звальненьнем былым супрацоўнікам Вярхоўнай рады.
