Лінкі ўнівэрсальнага доступу

Фэйсбук заблякаваў акаўнты шэрагу ўльтраправых камэнтатараў


Янопулас, Джонс и Фарахан.
Янопулас, Джонс и Фарахан.

Карпарацыя Facebook заблякавала ў сваіх сацыяльных сетках Фэйсбук і Інстаграм акаўнты некалькіх вядомых палітычных камэнтатараў, абвінаваціўшы іх у «распальваньні нянавісьці».

Гаворка ідзе пра сталую, а не часовую блякіроўку. Гэтыя захады тычацца сямі акаўнтаў, большасьць уладальнікаў якіх прытрымліваюцца ўльтраправых поглядаў.

Так, у Фэйсбуку і Інстаграме выдаленыя акаўнты амэрыканскага радыёвядучага стваральніка сайту InfoWars Алекса Джонса, вядомага сваімі кансьпіралягічнымі тэорыямі.

У Фэйсбуку заблякаваны акаўнт брытанскага палітычнага камэнтатара Майла Янопуласа, у мінулым аднаго зь вядучых аўтараў сайту Breitbart, які зьяўляецца крытыкам ісламу, атэізму, фэмінізму, палітычнай карэктнасьці.

Былі заблякаваныя таксама акаўнты амэрыканскай ультраправай палітычнай актывісткі Лоры Лумэр, брытанскага відэаблогера Пола Ўотсана і рэспубліканца Пола Нэлэна, якія таксама выступалі з ультраправых пазыцый. Акрамя таго, заблякаваны акаўнт лідэра радыкальнай групоўкі «Нацыя ісламу» Луіса Фарахана, вядомага антысэміцкімі заявамі. Раней акаўнт Джонса быў заблякаваны на Youtube, а Янопуласа — у Twitter.

Кіраўніцтва Facebook, асабліва пасьля пачатку расьсьледаваньня расейскага ўмяшаньня ў выбары прэзыдэнта ЗША ў 2016 годзе, неаднаразова абяцала зрабіць больш жорсткай барацьбу з распальваньнем нянавісьці ў сацсетках. Кампанію, аднак, крытыкавалі за тое, што яна не выконвае сваіх абяцаньняў. Зрэшты, яе крытыкуюць і з процілеглых пазыцый, абвінавачваючы ва ўшчамленьні свабоды слова. Крытычныя заўвагі на адрас буйных інтэрнэт-карпарацый, уключаючы Google і Twitter, гучалі і ад прэзыдэнта ЗША Дональда Трампа, які сьцьвярджаў, што яны душаць кансэрватыўных камэнтатараў і спрыяюць лібэралам.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG