Першы прэзыдэнт Казахстану, старшыня партыі «Нур Атан» («Сьвет Айчыны») Нурсултан Назарбаеў 23 красавіка заявіў на пазачарговым зьезьдзе партыі, што пачаў рыхтавацца да адстаўкі тры гады таму, піша ТАСС.
«Калі я казаў, што прыняў асэнсаванае рашэньне, гэта сапраўды так. Такія рашэньні не прымаюцца ні за адзін дзень, ні за адзін месяц», — сказаў Назарбаеў.
Ён адзначыў, што ў гэты час разважаў пра будучыню і пра мінуўшчыну, глядзеў на сваіх паплечнікаў і «выхоўваў іх». Назарбаеў вылучыў на кандыдата ў прэзыдэнты свайго пераемніка Касыма-Жамарта Такаева, які выконвае абавязкі кіраўніка дзяржавы.
Выбары прэзыдэнта Казахстану адбудуцца 9 чэрвеня.
Нурсултан Назарбаеў 19 сакавіка пакінуў пасаду прэзыдэнта. Ён працягвае ўзначальваць Савет бясьпекі Казахстану і кіроўную партыю «Нур Атан».
Савет бясьпекі ў Казахстане, па сутнасьці, вызначае асноўныя кірункі разьвіцьця краіны. Ён таксама кантралюе выкананьне законаў і абмяркоўвае кандыдатуры чыноўнікаў, якія рэкамэндуюцца на кіраўнікоў цэнтральных і мясцовых выканаўчых органаў, што падпарадкуюцца прэзыдэнту. Кіруючы Саветам бясьпекі, Назарбаеў па-ранейшаму зможа кантраляваць кадравую і стратэгічную палітыку Казахстану.