Лінкі ўнівэрсальнага доступу

Пасьля відэапаўтору адмянілі вырашальны гол у чвэрцьфінале Лігі чэмпіёнаў


Пасьля голу Стэргінга, які затым скасуюць, 17 красавіка

У паўфінал выйшлі «Лівэрпуль» і «Тотэнгэм». Другі прапусьціў ад «Манчэстэр Сіці» больш галоў, чым забіў, але вырашальны скасавалі праз офсайд — упершыню на матчы такога ўзроўню з дапамогай відэапаўтору.

Вечарам 17 красавіка ў ангельскім Манчэстэры праходзіў другі чвэрцьфінальны матч эўрапейскай Лігі чэмпіёнаў UEFA між мясцовым «Сіці» і ангельскім «Тотэнгэмам». У першым «Тотэнгэм» перамог дома 1:0.

Матч быў напружаны і багаты на галы, за першыя 22 хвіліны каманды забілі пяць галоў. На 73-й хвіліне лік быў 4:3 на карысьць «Сіці». Гол за «Тотэнгэм» забіў на той хвіліне Фэрнанда Льлярэнтэ​, але судзьдзя доўга пераглядаў відэапаўтор (VAR): не было відавочна, ці быў забіты мяч рукой. Гол усё ж залічылі.

Такі вынік задавальняў «Тотэнгэм»: 1:0 дома і 3:4 на выезьдзе — сумарна роўны лік, але перамога ў колькасьці галоў на выезьдзе. Але «Сіці» не зьмірылася і атакавала да канца матчу, ужо ў даданы час Рахім Стэрлінг забіў «Тотэнгэму». Але гэты гол скасавалі — пасьля перагляду відэапаўтору судзьдзя вырашыў, што ягоны аднаклюбнік Сэрхіё Агуэра быў па-за гульнёй, калі аддаваў галявы пас.

Упершыню на матчы такога ўзроўню на табло загарэўся надпіс «No goal. VAR. Offside»
Упершыню на матчы такога ўзроўню на табло загарэўся надпіс «No goal. VAR. Offside»

Рэакцыя афіцыйнага твітэру «Сіці» на скасаваны гол:

Галоўны трэнэр «Сіці» Жузэп Гуард'ёла пасьля матчу казаў, што падтрымлівае сыстэму відэапаўтораў, хоць такая параза — «гэта жорстка». Паўабаронца клюбу Фэрнандзіньню пасьля гульні выказаўся журналістам нецэнзурна, сэнс таго выказваньня быў «Далоў VAR». А галоўны трэнэр «Тотэнгэму» па-ранейшаму крытыкуе відэапаўторы, нават пасьля такой перамогі.

Відэапаўторы былі ўведзеныя ў «вялікім» футболе толькі летась. Спачатку не чакалася, што ў Лізе чэмпіёнаў яны будуць выкарыстоўвацца ўжо ў гэтым сэзоне (і не выкарыстоўваліся на групавым этапе). Але UEFA вырашыла выкарыстоўваць VAR ад 1/16 фіналу. Таксама відэапаўторы будуць глядзець у наступнай Лізе чэмпіёнаў.

У паўфіналах сустрэнуцца «Тотэнгэм» і нідэрляндзкі «Аякс», ангельскі «Лівэрпуль» і гішпанская «Барсэлёна». Фінал пройдзе 1 чэрвеня ў Мадрыдзе.

Пасьля 1 чэрвеня будуць і іншыя, але менш значныя зьмены ў правілах футболу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG