Вольга Павук, жонка блогера і актывіста Андрэя Павука, паведаміла на Facebook пра яго затрыманьне: нібыта зь ягонага кампутара адправілі паведамленьне пра бомбу ў райвыканкаме. Таксама ёсьць пракурорская санкцыя на ператрус у іхнай кватэры.
Сьледчы камітэт распачаў крымінальную справу па ч. 1 арт. 340 Крымінальнага кодэксу Беларусі за ілжывае паведамленьне аб мініраваньні будынка Кастрычніцкага райвыканкаму, паведаміла на сваёй старонцы ў «Фэйсбуку» афіцыйны прадстаўнік УСК па Гомельскай вобласьці Марыя Крываногава.
«Паведамленьне аб закладзенай выбуховай прыладзе паступіла сёньня раніцай на электронную пошту Гомельскага абласнога ўпраўленьня МНС РБ. На месцы здарэньня працуе сапёрна-піратэхнічная група. Работнікі і наведвальнікі райвыканкаму эвакуяваныя», — напісала Крываногава.
Паводле гэтага артыкулу, Андрэю Павуку пагражае штраф, арышт або пазбаўленьне волі на тэрмін да 5 гадоў.
У кватэры блогера праходзіць ператрус
Вольга Павук на сваёй старонцы ў «Фэйсбуку» з 12.40 вяла прамую трансьляцыю зь месца ператрусу.
Пастанову пра ператрус жыльля ёй прад’явілі, але на рукі не далі, паведамляе БелаПАН. Яна пасьпела заўважыць, што ў дакумэнце ўказаны няправільны адрас, а таксама тое, што ў зьдзяйсьненьні злачынства падазраецца «неўстаноўленая асоба».
З кватэры Павука канфіскавалі кампутарную тэхніку, мабільныя прылады і носьбіты інфармацыі.
Супрацоўнік міліцыі ў форме папрасіў Вольгу спыніць відэаздымку на той падставе, што яна выдае дадзеныя папярэдняга сьледзтва. Спачатку яна адмовілася гэта зрабіць, але каля 13.30 ўсё ж спыніла здымкі, баючыся, што ў яе канфіскуюць тэлефон.
Андрэй Павук цяпер вядомы ў сувязі з акцыямі ў ягоным родным пасёлку Акцябрскім, спрэчкамі зь мясцовымі ўладамі. Яго і раней перасьледавалі за актывізм, у тым ліку судзілі з загадзя напісаным выракам.
Упершыню ж ягонае імя стала вядомае шырокай публіцы празь песьню «Я из деревни» — кліп здымалі для конкурсу БРСМ, у выніку ён стаў інтэрнэт-мэмам.
