Лінкі ўнівэрсальнага доступу

Людзям з інваліднасьцю абяцалі 90-працэнтныя зьніжкі на білеты Эўрапейскіх гульняў


Ілюстрацыйнае фота

Заўзятары з інваліднасьцю змогуць купіць квіткі на Эўрапейскія гульні ў Менску за 10 адсоткаў ад цаны.

Аматары спорту, абмежаваныя ў магчымасьцях перасоўваньня, змогуць набыць квіткі на спаборніцтвы ІІ Эўрапейскіх гульняў, якія пройдуць у Менску 21–30 чэрвеня, усяго за 10% цаны наміналу, — паведаміла Алена Сацюк, супрацоўніца дырэкцыі ІІ Эўрапейскіх гульняў 2019 году.

Яна расказала, што на кожнай спартовай арэне, дзе будуць праходзіць спаборніцтвы, вызначалі спэцыяльныя месцы для людзей з інваліднасьцю. Усіх такіх заўзятараў падзеляць на тры катэгорыі, і кожная будзе мець свае месцы:

  • для людзей на інвалідных вазках і асобаў, якія іх суправаджаюць,
  • для тых, хто дрэнна бачыць (іхныя месцы будуць найбліжэй да арэны спаборніцтваў),
  • для людзей з аслабленым апорна-рухальным апаратам — іх разьмесьцяць паблізу ад праходаў на трыбунах.

Усяго для такіх асобаў дырэкцыя падрыхтавала 3 тысячы квіткоў. Для таго, каб купіць такі квіток, трэба прад’явіць пасьведчаньне інваліда.

Такія магчымасьці прадугледжаныя для грамадзян Беларусі і іншаземцаў. Для іх па папярэдняй заяўцы квіткі будуць прадавацца ў касах каля спартовых аб’ектаў.

Таксама на кожным аб’екце будуць працаваць валянтэры, якія дапамогуць прайсьці на месца і пакінуць яго. Для людзей з абмежаванымі магчымасьцямі ў барах спартовых аб’ектаў паставяць нізкія сталы, каб людзям на вазках было зручна.

Як лічыць дырэктар Офісу правоў людзей з інваліднасьцю Сяргей Драздоўскі, дырэкцыя ІІ Эўрапейскіх спартыўных гульняў зрабіла ўсё магчымае, каб такія людзі адчувалі сябе камфортна. Самае складанае пытаньне — гэта тое, як змогуць даехаць да спартовага аб’екта тыя, хто вырашыць скарыстацца грамадзкім транспартам.

«Тут Міністэрству транспарту Беларусі і Менскаму гарвыканкаму яшчэ ёсьць над чым папрацаваць», — заявіў Драздоўскі.

Эўрапейскія гульні — 2019. Што важна ведаць

Другія Эўрапейскія гульні пройдуць у Менску з 21 па 30 чэрвеня 2019 году.

  • З квітком на гульні можна будзе бязь візы трапіць у Беларусь празь любы памежны пункт.
  • На Эўрапейскія гульні ў Менск чакаюць 30 тысяч замежных турыстаў. Для параўнаньня, на чэмпіянат сьвету па хакеі ў Менск у 2014 годзе прыехалі 80 тысяч замежных турыстаў.​
  • Нямецкі алімпійскі камітэт прыгразіў байкатаваць Эўрапейскія гульні ў Менску праз затрыманьні беларускіх журналістаў.
  • 72 мільёны даляраў будзе каштаваць турнір бюджэту Беларусі.
    Як вырас кошт правядзеньня Эўрапейскіх гульняў
    Як вырас кошт правядзеньня Эўрапейскіх гульняў
  • Падчас гульняў у Беларусі будуць працаваць супрацоўнікі МУС Расеі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG