Лінкі ўнівэрсальнага доступу

Мінпрацы растлумачыла, чаму не скасуе кантрактную сыстэму


Удзельнікі «Маршу недармаедаў» у Берасьці, 2017 год. Сярод патрабаваньняў «Маршаў недармаедаў» было і скасаваньне кантрактнай сыстэмы

На сайце Petitions.by зьявіўся афіцыйны адказ на зварот з патрабаваньнем скасаваць тэрміновы працоўны кантракт як форму найманьня працаўнікоў. Аўтар пэтыцыі мяркуе, што такая форма дае наймальніку права «бязь лішніх тлумачэньняў разьвітацца з працаўніком» па заканчэньні кантракту.

Адказ на зварот даў намесьнік міністра працы Ігар Старавойтаў — і разгорнута абгрунтаваў адмову. У адрозьненьне ад «звычайных» кароткіх адказаў на пэтыцыі, ягоны заняў аж тры старонкі.

Чаму людзям не падабаецца кантрактная сыстэма

Кантрактная сыстэма была ўведзеная ў 1999 годзе. Яна выклікала абурэньне некаторых працаўнікоў тым, што кантракты можна заключаць толькі на год і не працягваць без тлумачэньняў (згодна з падлікамі Фэдэрацыі прафсаюзаў Беларусі, на 1 год у краіне заключана каля 30% кантрактаў). Таксама сыстэма дазваляе кіраўнікам арганізацыяў на тэрмін кантракту:

  • пазбаўляць працаўнікоў прэміяў або разрываць кантракты раней за тэрмін з шэрагу прычынаў;
  • мяняць умовы кантрактаў з вытворчых, арганізацыйных ці эканамічных прычын (пры нязгодзе — звальненьне);
  • не звальняць працаўніка да заканчэньня кантракту, нягледзячы на яго жаданьне.
Пікет на стадыёне фабрыкі «Славянка» ў Бабруйску, 7 кастрычніка 2016 году
Пікет на стадыёне фабрыкі «Славянка» ў Бабруйску, 7 кастрычніка 2016 году

Незалежныя прафсаюзы ня раз называлі кантрактную сыстэму рэпрэсіўнай. Супраць кантрактнай сыстэмы пратэставалі і апазыцыйныя кандыдаты ў прэзыдэнты, і простыя грамадзяне. Так, кантракты часта згадваліся ў патрабаваньнях удзельнікаў нядаўніх «Маршаў недармаедаў». Беларусь уключаная ў міжнародны сьпіс парушальнікаў правоў працоўных і прафсаюзаў.

Што адказала Мінпрацы, коратка

Намесьнік міністра працы Ігар Старавойтаў
Намесьнік міністра працы Ігар Старавойтаў

Паводле намесьніка міністра працы, кантракт — рэч добраахвотная, якая заключаецца са згоды абодвух бакоў, а наймальнікі ў большасьці галінаў не абавязаныя заключаць менавіта кантракты, а ня іншыя формы працоўных дамоваў.

Таксама, паводле Старавойтава, сыстэма тэрміновых кантрактаў:

  • накіраваная на забесьпячэньне дысцыпліны і парадку, падвышэньне адказнасьці і працаўніка, і наймальніка;
  • забясьпечвае гнуткасьць працоўных стасункаў і рацыянальную арганізацыю працы;
  • дазваляе працаўніку самому звольніцца без тлумачэньня прычынаў па завяршэньні кантракту;
  • дазваляе наймальніку «замацаваць працаўніка ў арганізацыі»;
  • бароніць правы асобных катэгорыяў працаўнікоў, як то жанчын у дэкрэтным адпачынку або асобаў перадпэнсійнага ўзросту;
  • не абмяжоўвае права наймальніка заключаць бестэрміновыя кантракты.

«У цяперашні час і працаўніку, і наймальніку дадзенае права выбару пры вызначэньні тэрміну працоўных стасункаў у канкрэтнай сытуацыі, — запэўнівае Старавойтаў. — Пры гэтым часьцяком працаўнікі не сьпяшаюцца заключаць працоўны кантракт на нявызначаны тэрмін, жадаючы атрымаць або захаваць дадзеныя ім працоўныя гарантыі, вызначаныя кантрактам».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG