Лінкі ўнівэрсальнага доступу

«Мы зьнішчылі 99% „Ісламскай дзяржавы“», — дзяржсакратар ЗША


Дзяржсакратар ЗША Майк Пампэо

Дзяржсакратар ЗША Майк Пампэо заявіў, што ваенная кампанія ў Сырыі супраць тэрарыстаў арганізацыі «Ісламская дзяржава» была «неверагодна пасьпяховай». ЗША разам з саюзьнікамі разьбілі 99% ісламістаў «Ісламскай дзяржавы».

Пра гэта гаворыцца ў стэнаграме з прамовы Пампэо, якую распаўсюдзіў Дзяржаўны дэпартамэнт ЗША.

«Мы разьбілі 99% халіфата. Гэта павінна быць першым сказам у кожным паведамленьні, ці ня так? Гэта неверагодна пасьпяховая кампанія, і ў нас было шмат добрых партнэраў», — сказаў Пампэо.

Ён падкрэсьліў, што ЗША «працягнуць сачыць за тым, каб узмацненьне „Ісламскай дзяржавы“, якое адбылося пры адміністрацыі Абамы (папярэдняга прэзыдэнта ЗША — РС), больш не паўтарылася».

19 сьнежня прэзыдэнт ЗША Дональд Трамп заявіў пра перамогу над баевікамі «Ісламскай дзяржавы» ў Сырыі і анансаваў «поўнае» і «хуткае» вывядзеньне амэрыканскіх войскаў адтуль. Камандаваньне амэрыканскай арміі не пагадзілася з прэзыдэнтам, палічыўшы вывад войскаў заўчасным.

1 студзеня стала вядома, што Трамп пагадзіўся запаволіць вывад войскаў і даў на гэта чатыры месяцы. Паводле СМІ, прэзыдэнт ЗША зьмяніў сваю пазыцыю пасьля візыту на амэрыканскую ваенную базу ў Іраку ў канцы сьнежня. Ваеначальнікі нібыта пераканалі Трампа, што джыхадысты да канца не пераможаныя.

3 студзеня дзяржсакратар Майк Пампэо паведаміў, што вайскоўцы Злучаных Штатаў пачалі пакідаць Сырыю.

У Сырыі, на тэрыторыі, непадкантрольнай ураду Башара Асада, разьмешчана каля 2 тысяч амэрыканскіх вайскоўцаў. Яны вядуць барацьбу з «Ісламскай дзяржавай» у складзе міжнароднай кааліцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG