ВВС накіравала афіцыйную скаргу ў міністэрства замежных спраў Расеі ў сувязі з публікацыяй пэрсанальных дадзеных супрацоўнікаў карпарацыі, якія працуюць у Маскве. Аб гэтым паведамляе сайт брытанскай мэдыякарпарацыі.
Кіраўнік Усясьветнай службы ВВС Джэймі Ангус заявіў:
«Мы папрасілі расейскія ўлады расьсьледаваць гэтае здарэньне, якое ня можа не выклікаць трывогу. Бясьпека нашых супрацоўнікаў у Маскве зьяўляецца нашым прыярытэтам. Для нашай аўдыторыі ў Вялікай Брытаніі і па ўсім сьвеце важная праца, якую маскоўскае бюро ВВС выконвае на працягу многіх гадоў.
Мы заўсёды працавалі ў Расеі ў адпаведнасьці з расейскім заканадаўствам і добрасумленна скіраваліся правіламі ліцэнзаваньня і атрыманьня акрэдытацый. Таму нас асабліва непакоіць тое, што асабістыя дадзеныя нашых супрацоўнікаў, якія мы далі расейскім уладам у рамках нашай законнай дзейнасьці, былі раскрытыя падобным чынам».
Прадстаўнік МЗС Расеі Марыя Захарава напісала ў Фэйсбуку, што ведамства «на канец дня 29 сьнежня» не атрымлівала ніякіх зваротаў са скаргамі ад ВВС. «Лёндан гуляе ўсё брудней», — напісала Захарава.
Прэс-сакратар прэзыдэнта Расеі Дзьмітрый Пяскоў сказаў 28 сьнежня, што Крэмль не ўхваляе публікацыю пэрсанальных дадзеных супрацоўнікаў ВВС, але ставіцца да гэтага «з разуменьнем».
25 сьнежня сайты pikabu.ru і segodnya.ru, а таксама супольнасьць «УКантакце» пад назвай «За Матушку-Россию» апублікавалі сьпіс 44 супрацоўнікаў ВВС, якія працуюць у Расеі, у тым ліку іх поўныя імёны і фатаздымкі. Сайт segodnya.ru назваў сьпіс «Наш адказ Чэмберлену». У публікацыі згадвалася, што нядаўна ў заходніх СМІ быў апублікаваныя сьпіс расейскіх журналістаў, а «знайсьці і апублікаваць сьпіс іх журналістаў, якія працуюць на тэрыторыі Расеі і ва ўсім бачаць змову, няцяжка».
Гаворка ішла пра нататку ў газэце Sunday Times, якая апублікавала фатаздымкі васьмі супрацоўнікаў брытанскага бюро Sputnik з указаньнем іх пасадаў. ВВС ніколі не друкавала гэты сьпіс.
Пасьля гэтага афіцыйны прадстаўнік МЗС Марыя Захарава заявіла, што расейскія дыпляматы «распрацоўваюць пытаньне контразахадаў».