Прэм’ер-міністар Расеі Дзьмітрый Мядзьведзеў 28 сьнежня падпісаў рашэньне пра стварэньне расейска-беларускай працоўнай групы для абмеркаваньня разнастайных аспэктаў інтэграцыі і спрэчных пытаньняў, піша ТАСС.
Адначасова з гэтым міністар фінансаў Расеі Антон Сілуанаў у размове з тэлеканалам «Россия 24» выказаўся пра інтэграцыю дзьвюх дзяржаваўі падатковы манэўр у Расеі, піша БелаПАН.
Што сказаў Сілуанаў?
- «Апошнім часам мы не заўсёды бачым партнэрскае стаўленьне Беларусі да Расейскай Фэдэрацыі».
- «Калі мы ідзем па шляху інтэграцыі, далейшай інтэграцыі (такія пляны былі раней сфармуляваны), то трэба быць партнэрамі. І калі мы ідзем на сустрэчу, то хочам такіх жа крокаў зь беларускага боку». Менавіта таму ён прапанаваў стварыць працоўную групу па інтэграцыі.
- «Што кажуць нашыя калегі зь Беларусі? Калі вы павялічваеце ўнутраныя цэны на нафту, то і мы яе атрымоўваем па больш вялікім кошце. Дайце нам такія ж субсыдыі, як і нашым прадпрыемствам. Мы кажам: выбачайце, вашыя прадпрыемствы – гэта не расейскія прадпрыемствы, не нашыя падаткаплатнікі. Пра такую ступень субсыдаваньня эканомікі суседняй краіны з боку расейскага бюджэту можна казаць, калі ў нас будзе больш глыбокая ступень інтэграцыі».
Што важна ведаць пра расейскі падатковы манэўр
Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.
- Расея пачала рэалізацыю падатковага манэўра зь 2019 году.
- Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
- У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
- Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.
Страты і кампэнсацыя
- У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
- Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
- Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн.
- У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
- 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.
Кароткая гісторыя нафтагазавых канфліктаў Беларусі і Расеі
