Жыхарка расейскага Екацярынбургу Юлія Савіноўскіх, у якой пасьля апэрацыі па выдаленьні грудзей органы апекі адабралі двух прыёмных сыноў, зьехала з Расеі. Пра гэта яна паведаміла выданьню «Такие дела».
Савіноўскіх атрымала прытулак у Гішпаніі. Шматдзетная маці вырашыла зьехаць з Расеі пасьля таго, як атрымала пагрозы, што ў яе могуць адабраць родных дзяцей.
У Юліі Савіноўскіх забралі двух прыёмных дзяцей у канцы жніўня 2017 году. Гэта адбылося пасьля таго, як яна праз праблемы са здароўем зрабіла апэрацыю па выдаленьні грудзей. Перад апэрацыяй Савіноўскіх ў якасьці псыхалягічнай падрыхтоўкі вяла блог ад імя выдуманага трансгендэра, які рыхтуецца зьмяніць пол. Адабраньне дзяцей у Екацярынбурскім абласным міністэрстве сацыяльнай палітыкі патлумачылі нейкімі «супярэчнасьцямі» паміж інтарэсамі дзяцей і апекуна. У чым менавіта гэтыя супярэчнасьці, ні суд першай інстанцыі, ні апека, ні міністэрства не ўдакладнялі.
Савіноўскіх аб’яўляла галадоўку на знак пратэсту супраць канфіскацыі яе прыёмных дзяцей.