Прэзыдэнт Расеі Ўладзімір Пуцін анансаваў абмеркаваньне спрэчных энэргетычных пытаньняў, адкрываючы сустрэчу ў Маскве з прэзыдэнтам Беларусі Аляксандрам Лукашэнкам.
«Зразумела, ёсьць і пытаньні, пры такім вялікім аб’ёме ўзаемадзеяньня заўсёды пытаньні ўзьнікаюць, яны ляжаць, як правіла, у нас у сфэры энэргетыкі, — цытуе прэзыдэнта Расеі агенцтва ТАСС. — У нас сёньня ёсьць магчымасьць пагаварыць па ўсіх гэтых тэмах».
«Нягледзячы на пытаньні, якія ўзьнікаюць у нас у гэтых сфэрах, нам заўсёды з Вамі ўдавалася знаходзіць рашэньне», — сказаў Пуцін.
У сваю чаргу Аляксандар Лукашэнка сказаў, што Масква і Менск «сапраўды могуць дамовіцца» па спрэчных пытаньнях энэргетыкі, каб «не цягнуць старыя праблемы ў новы год».
Кажучы пра фармат працы на перамовах, Пуцін запрасіў Лукашэнку на працоўны абед для абмеркаваньня пытаньняў сам-насам. «Я прапаную такі парадак: мы паслухаем, як нашы калегі працавалі, потым дамо магчымасьць дэлегацыям яшчэ пагутарыць, а я хачу потым вас яшчэ асобна запрасіць на абед рабочы, пераднавагодні», — сказаў Пуцін.
Як адзначае БелТА, напярэдадні візыту Лукашэнка правёў нараду з удзелам кіраўніцтва ўраду, прысьвечаную супрацоўніцтву з суседняй краінай. Ён адзначыў, што Расея для Беларусі застаецца ключавым зьнешнім партнэрам. Аднак ня ўсе падпісаныя дамовы выконваюцца. Беларускі кіраўнік запэўніў, што Менск мае намер выразна акрэсьліць і адстойваць сваю пазыцыю.
«Я ўжо не кажу пра Расею як братнюю дзяржаву, таму што, як мяне інфармуюць, у Расеі гэта не ўспрымаецца, — не хаваў раздражненьня Лукашэнка. — Нібыта прыйшлі новыя людзі, якім гэтае паняцьце непрымальнае. Што ж, будзем партнэрамі».
Перад гэтым на сустрэчы з расейскімі журналістамі Аляксандар Лукашэнка жорстка адрэагаваў на прапановы расейскага прэм’ер-міністра Дзьмітрыя Мядзьведзева аб больш глыбокай інтэграцыі ў рамках так званай Саюзнай дзяржавы (агульных валюты, суду і мытні), а таксама казаў, што шантажаваць Беларусь марна.
Апошні раз Лукашэнка і Пуцін сустракаліся 6 сьнежня ў Санкт-Пецярбургу, дзе публічна паспрачаліся адносна цэнаў на газ.
