Лінкі ўнівэрсальнага доступу

МЗС Украіны: патрабуем ад Расеі спыніць самавольства ў Крыме


Будынак МЗС Украіны ў Кіеве

Міністэрства замежных справаў Украіны патрабуе ад Расеі выконваць міжнароднае права, «спыніць самавольства» і не парушаць правы чалавека ў Крыме.

«Патрабуем ад дзяржавы-агрэсара спыніць на часова акупаванай ёю тэрыторыі самавольства і забясьпечыць выкананьне міжнароднага права, вызваліць усіх незаконна ўтрымліваных палітычных зьняволеных, у прыватнасьці, Алега Сянцова, Уладзіміра Балуха і Эмір-Усэіна Куку. Запэўніваем, што Ўкраіна прыкладзе ўсе неабходныя намаганьні для прыцягненьня вінаватых у парушэньні правоў чалавека да адказнасьці», — гаворыцца ў паведамленьні.

У міністэрстве таксама віталі ўхваленьне Генэральнай асамблеяй ААН рэзалюцыі наконт сытуацыі ў галіне правоў чалавека ў Крыме.

​Рэзалюцыя, прынятая Генэральнай асамблеяй ААН заклікае забясьпечыць правы чалавека і базавыя свабоды ўкраінскіх палітвязьняў, якія ўтрымліваюцца ў Крыме і ў Расеі, у тым ліку права на мэдычную дапамогу, доступ лекараў і спэцыялістаў міжнародных арганізацый, у прыватнасьці, Чырвонага Крыжа і Эўрапейскага камітэту ў справе недапушчэньня катаваньняў, для праверкі стану здароўя затрыманых.

Беларусь прагаласавала супраць ухваленьня гэтай рэзалюцыі.

Гэта ўжо трэцяя ініцыяваная Ўкраінай рэзалюцыя ААН аб стане правоў чалавека ў Крыме, ухваленая Генэральнай асамблеяй за апошнія два гады. Першыя дзьве былі ўхваленыя ў 2016 і 2017 годзе.

У прыватнасьці, у рэзалюцыі 2017 году ад Расеі патрабавалі выканаць часовыя захады рэкамэндацыяў Міжнароднага суду ААН аб адмене забароны Мэджлісу крымскататарскага народу ў Крыме і забясьпечыць навучаньне на ўкраінскай і крымскататарскай мовах на паўвостраве.

У рэзалюцыі 2016 году Расея была названая «краінай-акупантам», а Крым і Севастопаль — «часова акупаванай тэрыторыяй».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG