Лінкі ўнівэрсальнага доступу

Сястра мужчыны, які нібыта ўчыніў суіцыд у міліцэйскай машыне: «Міліцыя вінаватая, яны сябе прыкрываюць»


Сяргей Абрамовіч

Міліцыянты не паказваюць родным загінулага відэазапіс, які вёўся ў салоне службовага аўтамабіля.

Як стала вядома Свабодзе, у міліцэйскім аўтамабілі загінуў жыхар вёскі Слаўкава Нясьвіскага раёну, 48-гадовы Сяргей Абрамовіч. Аднавяскоўцы Сяргея з сумневам ставяцца да вэрсіі з суіцыдам. Свабода пагаварыла зь яго роднай сястрой Інай Русак.

«Усё здарылася 29 лістапада. Брат прыйшоў дадому, пасварыўся з бацькам моцна, — расказвае сястра загінулага мужчыны. — І бацька выклікаў на яго міліцыю. Прыехалі, забралі. Забіралі пры мне, я сама бачыла ўсё. А потым павезьлі яго ў бок Юшавіч (вёска ў Нясьвіскім раёне. — РС). Чаму не ў Нясьвіж у пастарунак? Гэта добрае пытаньне».

Іна Русак
Іна Русак

Пахаваньне Сяргея Абрамовіча адбылося 2 сьнежня. Пра тое, што мужчына загінуў, яго родным расказалі самі міліцыянты.

«Сьлядоў ад вяроўкі я на целе брата не знайшла, — працягвае Іна Русак. — Сьледчы прыехаў увечары, адказваў, што гэта ўсё брат сам. Даказвалі мне, званілі. Суіцыд. Шукалі запіску перадсьмяротную, але не знайшлі. Не было ніякай запіскі. Цяпер ідзе разбор, сьледчы пытаўся ў мяне, хто можа быць вінаваты ў сьмерці брата, якая мая думка. Я ім сказала, што вінаватая міліцыя».

За тры тыдні, якія прайшлі з моманту сьмерці Сяргея Абрамовіча, пытаньняў у яго родных толькі паболела. Асноўныя зь іх — чаму затрыманага пакінулі ў міліцэйскім аўтамабілі аднаго і дзе запісы зь відэакамэры, усталяванай у салоне?

«Сказалі мне, што ён павесіўся на шнурку ад чаравіка, — расказвае сястра загінулага. — Але як гэта на шнурку, як гэта магчыма? Але калі нават і на шнурку, дапусьцім, так адбылося. То чаму яны тады яго аднаго пакінулі? Паводле правілаў, яны ня могуць пакідаць затрыманых адных у машыне. Там была новая машына, УАЗ „Патрыёт“, у яе ў салоне камэры. Ідзе запіс. Мне ніякіх запісаў не паказалі. Цішыня ў адказ».

Паводле Іны, на целе брата яна знайшла невялікія пашкоджаньні. У яго быў пабіты твар.

«Зь левага боку на твары ў брата быў невялікі парэз. Патолагаанатам мне сказаў, што твар брата быў пашкоджаны, ён быў крыху пабіты. Перад пахаваньнем наносілі грым. Але ўсё адно быў шнар, каля сантымэтра. Але нават калі ён і сам павесіўся, няўжо ніхто нічога ня чуў? Усе глухія? Ніхто нічога ня чуў, ніхто ня бачыў. Міліцыянты мне сказалі, што згубілі яго зь віду».

Афіцыйны прадстаўнік упраўленьня Сьледчага камітэту Менскай вобласьці Тацяна Беланог пацьвердзіла Свабодзе, што здарэньне адбылося 29 лістапада ў міліцэйскай машыне. На пытаньне, ці быў гэта менавіта суіцыд, Тацяна Беланог сказала, што цяпер высьвятляюцца абставіны здарэньня і прычыны сьмерці, Нясьвіскі раённы аддзел Сьледчага камітэту праводзіць праверку. «Цяпер высьвятляюцца абставіны здарэньня, робяцца праверачныя захады. Прызначана судова-мэдыцынская экспэртыза, якая высьветліць дакладную прычыну сьмерці мужчыны 1969 году нараджэньня, сьледзтва зьбірае неабходныя матэрыялы».

У міліцыі патлумачылі дэталі трагічнага здарэньня. Мужчына знаходзіўся ў спэцыяльным адсеку ў міліцэйскай машыне, калі яго дастаўлялі ў РУУС. Пра гэта карэспандэнту Свабоды паведаміў прадстаўнік Менскай абласной міліцыі Яўген Сачак:

«Па выніках нашай праверкі адна з асноўных высноваў у тым, каб у гэтым адсеку зьмяніць канструкцыйныя асаблівасьці гэтага невялікага памяшканьня, каб выключыць такую магчымасьць зачапіцца нечым за яго. Гэта магчымасьць не была выключана. Па нашым бачаньні сытуацыі, ён зачапіўся за частку кратаў. Па выніках нашай праверкі зроблена выснова — выключыць гэту частку», — сказаў Сачак.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG