Прынамсі частку ўкраінскіх маракоў, арыштаваных расейскімі ўладамі пасьля іх захопу ў Чорным моры, пераводзяць з турмы ў анэксаваным Крыме ў Маскву.
Паведамленьні пра гэта, якія распаўсюдзілі крымскія актывісты і адвакаты, пацьвердзіла расейская ўпаўнаважаная ў правах чалавека ў Крыме Людміла Лубіна. Паводле яе, у Маскву «пераводзяць камандны састаў».
Расейскі адвакат Мікалай Полазаў пацьвердзіў сайту «Крым.реалии», што ўкраінскіх вайскоўцаў вывезьлі зь СІЗА Сімфэропаля. Ці ідзе гаворка пра ўсіх арыштаваных або іх частку — ён не ўдакладніў.
Усяго пад арыштам апынуліся 24 украінскія вайскоўцы, гэта вайсковыя маракі і двое супрацоўнікаў Службы бясьпекі Ўкраіны. Прынамсі трое зь іх параненыя, напярэдадні іх выпісалі з бальніцы ў Керчы і даставілі ў СІЗА.
Як паведаміў намесьнік міністра юстыцыі Ўкраіны Іван Ляшчына, Эўрапейскі суд ў правах чалавека ў чацьвер запатрабаваў ад Расеі да панядзелка даць інфармацыю пра месцазнаходжаньне ўкраінскіх вайскоўцаў, юрыдычныя падставы іх затрыманьня, пра раненьні і аказаную мэдычную дапамогу.
Тры ўкраінскія караблі і іх экіпаж былі затрыманыя Расеяй у выніку сілавой апэрацыі ў Чорным моры, ля берагоў Крыму непадалёк ад Керчанскай пратокі. Расея і Ўкраіна абвінавачваюць адзін аднаго ў правакацыі. Краіны Захаду патрабуюць ад Расеі вызваліць маракоў, а прэзыдэнт ЗША Дональд Трамп праз гэты канфлікт адмяніў заплянаваную на суботу сустрэчу з Уладзімірам Пуціным.
Што трэба ведаць пра канфлікт Украіны і Расеі ў Азоўскім моры
Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.
- Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
- Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
- Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
- Ці праўда, што ўкраінскія караблі парушылі расейскую мяжу ў Азоўскім моры?
- Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.
Дзе ва Ўкраіне ўвялі ваеннае становішча - Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
- Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
- Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
- Украіна на час дзеяньня ваеннага становiшча забараніла ўезд у краіну мужчынам – грамадзянам Расеі ва ўзросьце ад 16 да 60 гадоў.
- У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў