Праект «Беларускія ўікэнды» 23 лістапада запусьціў у пракат мультфільм «Неверагодны містэр Фокс». Праца амэрыканскага рэжысэра Ўэса Андэрсана ў 2010 годзе была двойчы вылучаная на прэмію «Оскар» — у намінацыях «найлепшы анімацыйны фільм» і «найлепшая арыгінальная музыка».
«Прыгодніцкі мультфільм „Неверагодны містэр Фокс“ — сапраўдны мастацкі твор. Ён створаны ўручную і задае зусім недзіцячыя пытаньні. У ім усё як у жыцьці: і праблемы стылізаваных герояў, кожны зь якіх вельмі рэалістычна паказвае свае звычкі, і рысы пэрсанажаў, знаёмых нам у рэальным жыцьці. Гэтую авантурную гісторыю па заслугах ацэняць як школьнікі, так і дарослыя», — адзначыў кіраўнік «Беларускіх ўікэндаў» Андрэй Кім.
Праект «Беларускія ўікэнды» займаецца перакладам і агучваньнем на беларускую мову разнаплянавых замежных фільмаў для дэманстрацыі ў кінатэатрах і онлайн-плятформе кампаніі Velcom Voka TV. Сярод агучаных ад 2016 году фільмаў — «Хронікі Нарніі: леў, вядзьмарка і гардэроб», «Маленькі прынц», «Форэст Гамп», «Шторм», «Жонка наглядчыка заапарка», «Кніга Ілая», «Таямніца Келз», «Таемнае жыцьцё Ўолтэра Міці», «Рыбка Поньё» «Падымаецца вецер», «Мой сябар жырафа» і іншыя.