Польская кіроўная партыя «Права і справядлівасьць» вынесла на разгляд Сэйму папраўкі да судовай рэформы, паведамляе польскае радыё.
Паводле паправак, прапануецца вярнуць траціну судзьдзяў Вярхоўнага суду, звольненых у рамках рэформы. Гэта стала першым буйным крокам насустрач патрабаваньням Эўразьвязу.
Улетку 2017 году Польшча абвясьціла пра маштабную судовую рэформу, якую скрытыкавалі ў ЭЗ і ўнутры краіны. Новы закон даў міністру юстыцыі права наймаць і звальняць кіраўнікоў судоў агульнай юрысдыкцыі.
У Брусэлі лічаць, што польскі закон аб судах «парушыў эўрапейскія нормы вяршэнства права». Пасьля няўдалых перамоваў з Варшавай летам 2018 году ўлады ЭЗ пачалі «санкцыйную працэдуру» супраць Польшчы. Калі працэс будзе даведзены да канца, Польшча можа стаць першай краінай Эўразьвязу, на якую Брусэль наклаў санкцыі, і страціць на некаторы час права голасу ў органах кіраваньня ЭЗ і ў Эўрапарлямэнце.
У прэс-рэлізе на сайце кіроўнай польскай партыі гаворыцца, што прыпыненьне рэформы зьвязанае з рашэньнем Эўразьвязу.
Унутры краіны рэформа справакавала масавыя пратэсты. Некалькі дзён запар сотні палякаў не пакідалі намётавы лягер у Варшаве насупраць Сэйму, а па ўсёй краіне праходзілі мітынгі пратэсту.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў