Адпаведны законапраект унёс у Сэйм прэзыдэнт Анджэй Дуда. На кампэнсацыю могуць разьлічваць асобы, якія былі дэпартаваныя ў Савецкі саюз у 1939-1956 гадах, паведамляе Польскае радыё.
Калі Сэйм прыме гэты закон, то атрымаць кампэнсацыю змогуць былыя жыхары заходняй Беларусі, якая ад 1921 па 1939 год уваходзіла ў склад Польшчы. Перашкодаў у прыняцьці закону быць не павінна. Прэзыдэнт Дуда быў абраны на пасаду галавы дзяржава з падтрымкай кіроўнай партыі ПіС, якая мае большасьць у Сэйме.
Шлях, які прайшлі і сотні тысяч беларусаў. Рэдкія здымкі з экспэдыцыі па сьлядах ГУЛАГу
Законапраект прадугледжвае выплату ссыльным дапамогі ў памеры, які будзе залежыць ад часу, які яны правялі ў выгнаньні. За кожны поўны месяц рэпрэсій яны атрымаюць па 200 злотых (больш за 46,5 эўра). Агулам дапамога не павінна быць меншая чым 2 400 злотых (амаль 559,5 эўра).
Дапамогай змогуць скарыстацца асобы, якія былі дэпартаваныя з тэрыторыі Польшчы ў Савецкі Саюз, так і тыя, хто нарадзіўся ў выгнаньні.
Для таго, каб атрымаць дапамогу ссыльныя павінныя выканаць пэўныя ўмовы. Па-першае, яны павінны прадаставіць адпаведнае пасьведчаньне аб тым, што былі дэпартаваныя і знаходзіліся ў выгнаньні. Па-другое, у момант падачы заяўкі на атрыманьне дапамогі яны павінны мець польскае грамадзянства.