Генпракурор прызнаў, што «праваахоўная сыстэма пакуль ня дала выніку» ў справе аб забойстве беларускага журналіста.
У інтэрвію тэлеканалу «Прямый» генэральны пракурор Украіны Юрый Луцэнка прызнаў адсутнасьць вынікаў у справе аб забойстве журналіста Паўла Шарамета, якое ўчынілі летам 2016 году.
Луцэнку спыталі, ці не паўторыцца сытуацыя з расьсьледаваньнем справы Шарамета ў справе аб забойстве журналісткі Кацярыны Гандзюк (яна памерла пасьля нападу зь сернай кіслатой, праз гэта Луцэнка падаў заяву аб адстаўцы).
«Так ужо ня выйдзе, — казаў Луцэнка пра справу аб забойстве Гандзюк. — Паколькі ў справе Шарамета сапраўды, зноў жа, адзін з людзей, які мае асабістыя стасункі... Няма нават выканаўцы.
Па справе Каці Гандзюк выяўленыя канкрэтныя чатыры выканаўцы і арганізатар. Спадзяемся, што мы выйдзем на замоўніка. Для гэтага ёсьць шмат падставаў і магчымасьцей. Калі надалей сьледзтва ня будуць дыскрэдытаваць і зьнішчаць, а наадварот зь ім супрацоўнічаць, то ўсё атрымаецца.
Па справе Шарамета, сапраўды, я прызнаю, уся праваахоўная сыстэма пакуль ня дала выніку. Зь іншага боку, трэба таксама не чакаць цудаў у асобна ўзятай краіне».
Яшчэ ў жніўні Луцэнка казаў, што ў справе Шарамета «маем адну нітачку», якая можа вывесьці на выканаўцу. Але тады ён падкрэсьліваў: гэта не дакладна, а толькі магчыма.
Журналіст Павал Шарамет быў забіты 20 ліпеня 2016 году ў цэнтры Кіева ў выніку падрыву аўтамабіля. Украінская ўлада кваліфікуе гібель журналіста як наўмыснае забойства.
У лютым сёлета цывільная жонка загінулага журналіста Паўла Шарамета, заснавальніца выданьня «Ўкраінская праўда» Алена Прытула зьвярнулася да генэральнага пракурора з заявай, у якой прасіла расьсьледаваць справу як тэрарыстычны акт, які прывёў да гібелі чалавека. Пазьней яна падала скаргу ў суд на бязьдзейнасьць генэральнага пракурора Луцэнкі ў справе аб выбуху. Рэдактарка «Ўкраінскай праўды» патрабуе прызнаць яе пацярпелай.
20 ліпеня 2018 першы намесьнік старшыні Нацыянальнай паліцыі Вячаслаў Аброськін паведаміў, што праваахоўнікі выявілі чалавека, «якога можна ідэнтыфікаваць» і які можа мець дачыненьне да забойства Шарамета.
Прадстаўнік пракуратуры Андрэй Лысенка заяўляў, што праваахоўнікі працуюць з чатырма асноўнымі вэрсіямі: прафэсійная журналісцкая дзейнасьць, асабістыя непрыязныя адносіны, дэстабілізацыя сытуацыі ва Ўкраіне, памылка з аб’ектам (падарваны аўтамабіль належаў цывільнай жонцы Шарамета, заснавальніцы «Ўкраінскай праўды» Алене Прытуле).
Разам з тым у межах справы пра падазрэньні пакуль нікому не паведамлялі.
