Лінкі ўнівэрсальнага доступу

Як улады ЗША змагаюцца з пагрозай паштовага тэрарызму


Ілюстрацыйнае фота. Пэрсанал міністэрства абароны ЗША ў ахоўных касьцюмах правярае падазроны канвэрт. 2 кастрычніка 2018 году

Пасылкі з выбухоўкай, разасланыя ў рэдакцыю CNN і лідэрам Дэмакратычнай партыі, уключаючы экс-прэзыдэнта Барака Абаму і былога дзяржсакратара Гілары Клінтан, яшчэ раз прадэманстравалі небясьпеку пагрозы паштовага тэрарызму — рассылкі выбуховых і атрутных рэчываў праз пошту.

Штодня Паштовая служба ЗША апрацоўвае 493,4 млн лістоў і пасылак — у сярэднім больш за 20 мільёнаў адпраўленьняў у гадзіну. За апошнія два дзесяцігодзьдзі паштавікі распрацавалі некалькі стратэгій, якія дазваляюць прадухіліць перасылку выбухоўкі і ядаў.

Двое супрацоўнікаў Паштовай службы загінулі ў Вашынгтоне неўзабаве пасьля тэрактаў 11 верасьня 2001 году. Тады невядомыя злачынцы разаслалі поштай некалькім журналістам і палітыкам лісты, у якіх былі споры сьмяротнага захворваньня — сыбірскай язвы. Памерлыя паштальёны займаліся сартаваньнем лістоў.

Сьмяротна небясьпечныя лісты атрымалі ў рэдакцыях некалькіх выданьняў у Нью-Ёрку і Флорыдзе, а таксама ў офісах тагачаснага лідэра сэнацкага большасьці Тома Дэшла і сэнатара Патрыка Ліхі. Усяго тады загінулі пяць чалавек (уключаючы дваіх паштальёнаў з Вашынгтону) і яшчэ 17 чалавек заразіліся сыбірскай язвай.

Пасьля рассыланьня заражаных лістоў у 2001 годзе ўлады ЗША зьмянілі парадак рэагаваньня на падобныя пагрозы. Паштовая служба запусьціла праграму «Выяўленьне небясьпечнай пошты» (Dangerous Mail Investigations) для пошуку падазроных адпраўленьняў на тэрыторыі ўсёй краіны. У цэнтрах апрацоўкі пошты паставілі спэцыяльнае абсталяваньне для вызначэньня актыўных біялягічных рэчываў. Яшчэ на пошце сталі стэрылізаваць пры дапамозе апрамяненьня ўсе адпраўленьні, якія паступаюць на адрас фэдэральных ведамстваў.

Упраўленьне службаў агульнага прызначэньня, якое кіруе фэдэральнай уласнасьцю, выпусьціла ў 2002 годзе ўказаньні па паштовай бясьпецы. Гэта было зроблена, каб «абараніць здароўе і бясьпеку фэдэральных і цывільных супрацоўнікаў у нашых паштовых цэнтрах». На сайце ведамства гаворыцца, што кіраўніцтва абнаўляецца па меры ўзьнікненьня новых пагроз.

У дакумэнце пералічваецца мноства элемэнтаў, якія павінны быць уключаны ў пратакол бясьпекі паштовага цэнтру ў кожным фэдэральнай ведамстве. Да такіх мераў належаць ацэнкі рызык, захады ў абароне супрацоўнікаў і працэсы праверкі зьмесьціва пошты, а таксама інструкцыі на выпадак узьнікненьня надзвычайнай сытуацыі.

У Паштовай службе кажуць, што лісты з атрутнымі рэчывамі або пасылкі з бомбамі звычайна высылаюць на хатнія адрасы, а выбуховыя прылады часта адпраўляюць у будынкі ведамстваў для таго, каб нанесьці шкоду максімальна вялікай колькасьці людзей.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG