Лінкі ўнівэрсальнага доступу

Альтэрнатыўную Нобэлеўскую прэмію па літаратуры атрымала француская пісьменьніца Марыз Кандэ


Лягатып Новай акадэміі.

Француская пісьменьніца Марыз Канде атрымала прэмію Новай акадэміі па літаратуры. Трансьляцыя абвяшчэньня пераможцы праходзіла праз Youtube-канал прэміі.

Узнагарода ўручаная за апісаньне «жахаў каляніялізму і хаосу посткаляніялізму». Новая акадэмія заснавана групай з больш чым ста культурных дзеячаў Швэцыі, каб замяніць Нобэлеўскую прэмію па літаратуры ў 2018 годзе.

Марыз Кандэ нарадзілася ў 1937 годзе ў Пуэнт-а-Пітр у францускай Гвадэлупе. Яна вядомая сваім гістарычным раманам «Я, Ціцюба. Чорная ведзьма Салема», які распавядае пра чарнаскурую жанчыну, асуджаную ў часе працэсу над салемскімі ведзьмамі ў XVII стагодзьдзі і іншымі гістарычнымі творамі пра жыцьцё ў Заходняй Афрыцы і на Карыбах.

Акрамя Кандэ, у шорт-лісьце прэміі апынуліся брытанскі фантаст Ніл Гейман, канадзкая пісьменьніца віетнамскага паходжаньня Кім Тьюі і японец Харукі Муракамі. Муракамі пазьней ад свайго ўдзелу ў конкурсе адмовіўся.

Кандэ атрымае грашовую ўзнагароду мільён швэдзкіх крон, гэта каля 112 тысяч даляраў ЗША, адзначае The New York Times.

Нобэлеўскі камітэт адмовіўся ад уручэньня прэміі па літаратуры ў 2018 годзе з прычыны скандалу ў Швэдзкай акадэміі. Мужа адной з членаў акадэміі западозрылі ў раскрыцьці імёнаў будучых ляўрэатаў і сэксуальных дамаганьнях. У кастрычніку яго прысудзілі да двух гадоў турмы. Прэмія будзе ўручана ў 2019 годзе.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG