Лінкі ўнівэрсальнага доступу

Падатак з «кампаній зь беларускімі каранямі» не разглядалі ў Палаце прадстаўнікоў


Ілюстрацыйнае фота

На партале Tut.by 10 кастрычніка быў апублікаваны артыкул, у якім сьцьвярджалася: «З замежных кампаній зь беларускімі каранямі ў Беларусі хочуць браць падатак з усяго сусьветнага даходу».

Такое палажэньне нібыта «прапісанае ў новай рэдакцыі Падатковага кодэксу, які мае набыць моц з 1 студзеня 2019 году».

Сябра камісіі бюджэту і фінансаў Палаты прадстаўнікоў, першы прарэктар Акадэміі кіраваньня пры прэзыдэнце Валер Барадзеня ў размове са Свабодай парэкамэндаваў вельмі асьцярожна падыходзіць да такіх навінаў. Ён лічыць, што гэтую навіну можна назваць «фэйкавай».

Валер Барадзеня (у цэнтры), архіўнае фота
Валер Барадзеня (у цэнтры), архіўнае фота

«Пачну з таго, што новая рэдакцыя Падатковага кодэксу яшчэ не паступала ў парлямэнт, — тлумачыць Барадзеня. — Так, кіраўнік краіны выказаў пажаданьне, каб гэты дакумэнт запрацаваў з 1 студзеня 2019 году. Але на сёньня дэпутаты не бачылі зьменаў да дзейнага кодэксу.

У гэтым пытаньні самае галоўнае — гэта азначэньне і дакладная фармулёўка таго, якую кампанію можна лічыць кампаніяй зь беларускімі каранямі. Бяз гэтага дыскусія страчвае ўсялякі сэнс».

Цяпер беларуская кампанія мусіць плаціць падатак у Беларусі з усяго даходу па ўсім сьвеце, а замежная — з тых даходаў, якія атрымлівае ў Беларусі, і з той маёмасьці, якую мае ў Беларусі. Ці кампанія беларуская, ці замежная, сёньня вызначаецца паводле месцазнаходжаньня найвышэйшага органа кіраваньня, месца прыняцьця ключавых кіроўных рашэньняў, месцазнаходжаньня асноўных бухгальтарскіх дакумэнтаў і месца жыхарства кіраўніка або заснавальніка.

У матэрыяле Tut.by сьцьвярджаецца, што крытэры прызнаньня кампаніі беларускай «дэталізаваныя і пашыраныя», што кампанію могуць прызнаць беларускай «адпаведна міжнароднай дамове Беларусі ў падатковых пытаньнях» і «ў выпадку бязьдзеяньня кампаніі ў дзяржаве, паводле заканадаўства якой яна створаная, і знаходжаньня фактычнага месца яе кіраваньня ў Беларусі».

Барадзеня кажа, што пакуль немагчыма дакладна сказаць, якіх кампаніяў гэты «падатак за беларускія карані» можа тычыцца, бо «калі няма юрыдычнага вызначэньня, то можна казаць, што такога паняцьця наагул не існуе». У прыклад ён прыводзіць мэсэнджэр Viber, у якога пры пэўных фармулёўках таксама можна пабачыць «беларускія карані».

«Нам трэба думаць пра іншае, а менавіта пра тое, як стварыць у Беларусі такія ўмовы, каб да нас прыходзілі ўсе кампаніі, — дадае Барадзеня. — А гэта цяжка, бо любая краіна хоча прыцягнуць да сябе бізнэс, каб пасьля ўзяць зь яго падаткі.

І яшчэ. Калі мая інфармацыя не састарэла, то Беларусь на сёньня мае дамовы болей чым з 60 краінамі аб пазьбяганьні двайнога падаткаабкладаньня. Як улічваць гэтыя міжнародныя нормы? Тут вельмі шмат пытаньняў, на якія пакуль няма адказу. Таму, вымушаны паўтарыцца: я не надаваў бы гэтай інфармацыі значэньня».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG