Лінкі ўнівэрсальнага доступу

На Гомельшчыне страйк: калгасьнікі пратэстуюць супраць звальненьня кіраўніка


9 кастрычніка даяркі і мэханізатары ААТ «Некрашынскі», жыхары вёскі Валосавічы Акцябрскага раёну Гомельскай вобласьці ня выйшлі на працу.

«Раённая ўлада звольніла нашага дырэктара; у нас ніхто не спытаўся, прычын не патлумачылі. Мы супраць», — патлумачыла Свабодзе адна з даярак, Валянціна.

Адкрытае акцыянэрнае таварыства «Некрашынскі» 19 гадоў узначальваў Васіль Лаханскі. Даяркі і мэханізатары хваляць яго.

«Лепшага за яго няма кіраўніка. Ён для нас стараўся. У нас у калгас едуць зь іншых вёсак працаваць. Мы будзем гарой стаяць за свайго дырэктара, адмаўляемся выходзіць на працу, пакуль яго ня вернуць», — заявіла Валянціна.

Да вяскоўцаў прыехаў старшыня Акцябрскага раённага абʼяднаньня прафсаюзаў Сяргей Зарычны.

Старшыня Акцябрскага раённага абʼяднаньня прафсаюзаў Сяргей Зарычны
Старшыня Акцябрскага раённага абʼяднаньня прафсаюзаў Сяргей Зарычны

«Ён нас угаворвае выйсьці на працу. Але прычыны звальненьня дырэктара нам не тлумачаць. Чалавек столькі гадоў адпрацаваў тут — і так яго растаптаць», — абураецца даярка.

Паводле яе, цяпер у Валосавічы прыехалі прадстаўнікі Акцябрскага райвыканкаму і міліцыі, але да людзей яны не падыходзяць.

«Яны хаваюцца за лазьняй. Сядзяць у сваіх аўтамабілях. Не каб выйсьці і пагаварыць з намі, патлумачыць сытуацыю», — дадала Валянціна.

У Акцябрскім райвыканкаме адказалі Свабодзе, што ведаюць пра сытуацыю і «разьбіраюцца», але таксама не назвалі прычынаў звальненьня дырэктара.

У раённай газэце «Чырвоны Кастрычнік» неаднаразова выходзілі артыкулы, у якіх дырэктара ААТ «Некрашынскі» хвалілі, а гаспадарку называлі адной з найлепшых у раёне.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG