Лінкі ўнівэрсальнага доступу

Лукашэнку і Парашэнку сустрэнуць у Гомлі новай пліткай з арнамэнтам. ФОТА


Плітку з арнамэнтам у Гомлі кладуць напярэдадні візыту Лукашэнкі і Парашэнкі

На вуліцы Савецкай у Гомлі — чарговы «плітачны» аўрал. Трэці за два месяцы. Двойчы горад рыхтавалі да прыезду Лукашэнкі. Першы раз ён не прыехаў, на другі раз — зьявіўся.

У канцы кастрычніка ў Гомлі чакаюць не толькі кіраўніка Беларусі Аляксандра Лукашэнку, але і прэзыдэнта Ўкраіны Пятра Парашэнку.

25-26 кастрычніка ў Гомлі пройдзе першы Форум рэгіёнаў Беларусі і Ўкраіны. Паводле папярэдняй праграмы, у мерапрыемстве прымуць удзел кіраўнікі дзьвюх дзяржаў.

На вуліцы Савецкай да важнай даты кладуць новую плітку — з нацыянальным арнамэнтам. У гарадзкой жыльлёва-камунальнай гаспадарцы пракамэнтавалі, што новая плітка будзе пакладзена ад старога ўнівэрмагу да перакрыжаваньня Савецкай з праспэктам Перамогі.

Пры дзьвюх летніх падрыхтоўках да візыту Лукашэнкі новыя тратуары з арнамэнтам ўпрыгожылі ўчастак ад плошчы Леніна да старога ўнівэрмагу на Савецкай.

Новай пліткай у бліжэйшы час упрыгожаць і візытку гораду — палацава-паркавы ансамбаль. Гарадзкія ўлады спадзяюцца, што такім чынам будзе дасягнутае «кампазыцыйнае сугучча» з афармленьнем узьбярэжжа ракі Сож ў цэнтральным парку. Там арнамэнтная плітка была пакладзена яшчэ ў 2015 годзе.

На Форуме плянуецца абмеркаваць пэрспэктывы рэгіянальнага супрацоўніцтва краін, прэзэнтаваць эканамічны і інвэстыцыйны патэнцыял Беларусі, падпісаць кантракты і пагадненьні. Удзельнікі пасяджэньняў абмяркуюць разьвіцьцё трансгранічнага супрацоўніцтва ў сфэрах турызму, экалёгіі, супрацоўніцтва ў паліўна-энэргетычнай і прамысловай галіне.

Не застануцца па-за ўвагай пытаньні ўзаемнай прысутнасьці на рынках Беларусі і Ўкраіны, тавараабароту, супрацоўніцтва ў сфэры адукацыі і навукі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG