Колькі яму плоцяць у берасьцейскім «Дынама», невядома. Аргентынскія СМІ пішуць, што больш за 20 млн даляраў за тры гады. У Мэксыцы, калі верыць аргентынскім СМІ, Марадона заробіць у 10 разоў менш, але за год.
Аргентынскі сайт Infobae заявіў, што атрымаў доступ да кантракту «ганаровага прэзыдэнта» футбольнага клюбу «Дынама Берасьце» Дыега Марадоны з мэксыканскім клюбам «Дарадас дэ Сіналоа».
Марадона, паводле выданьня, падпісаў кантракт на 11 месяцаў і атрымае 1,98 млн даляраў — каля 180 тысяч на месяц. Калі клюб зможа выйсьці ў найвышэйшы дывізіён (цяпер гуляе ў Ascenso MX, другім дывізіёне), то кантракт Марадоны аўтаматычна працягваецца. Таксама сьцьвярджаецца, што Марадону даецца права прысутнічаць на лаве запасных падчас матчаў.
Акрамя таго, мясцовыя СМІ сьцьвярджаюць, нібыта Марадона прасіў клюб арандаваць яму ранча з басэйнам недалёка ад трэнавальнай базы «Дарадас», аднак забясьпечаныя жыхары гэтай мясцовасці выступілі супраць такога суседзтва, палічыўшы, што магчымыя праблемы аргентынца з наркотыкамі могуць нэгатыўна адбіцца на прэстыжнасьці раёну.
Раней у аргентынскай прэсе хадзілі чуткі і пра тое, што Марадона купляе ў Менску катэдж за 20 млн даляраў з аэрадромам побач, ды беларускія СМІ выявілі, што такіх дарагіх катэджаў у Менску проста няма — а пасьля ў «Дынама» для Марадоны знайшлі дом у Берасьці.
***
Раней стала вядома, што Дыега Марадона будзе сумяшчаць працу ў Беларусі і ў Мэксыцы: ён стане тэхнічным дырэктарам мэксыканскага клюбу «Дарадас» (і будзе «кіраваць камандай») і разам з гэтым будзе на пасадзе «ганаровага прэзыдэнта» берасьцейскага «Дынама».
Беларускі клюб выдаў афіцыйную заяву аб тым, што Марадона быў запрошаны ў «Дынама» як «ганаровы прадстаўнік» (цяпер да пасады старшыні праўленьня дадаюць у дужках «ганаровы прэзыдэнт»), паводле ўмоваў кантракту можа займаць пасады ў іншых арганізацыях.
Колькі Марадона заробіць у «Дынама», не паведамлялася. Аргентынскія СМІ толькі разважалі, што сума кантракту на 3 гады можа перавысіць 20 млн даляраў — утрая больш, чым ён да таго меў у арабскім клюбам «Аль-Фуджэйра».
