У Бэслане ўспамінаюць ахвяр тэракту ў школе № 1. Жалобныя захады будуць праходзіць на працягу трох дзён. У суботу, 1 верасьня, цырымонія пачалася са школьнага званка і ўскладаньня кветак. Сваякі загінулых таксама прынесьлі сьвечкі, цацкі і бутэлькі з вадой — на працягу трох дзён закладнікам не давалі піць.
Жалобныя захады пройдуць таксама ва Ўладзікаўказе, у Маскве, Санкт-Пецярбургу і іншых гарадах.
1 верасьня 2004 году баевікі захапілі і ўтрымлівалі больш за 1200 вучняў і настаўнікаў. У выніку тэракту і штурму загінулі 334 чалавекі, 186 з іх — дзеці. Адказнасьць за тэракт узяў на сябе адзін з лідэраў чачэнскіх баевікоў Шаміль Басаеў.
У 2017 годзе Міністэрства юстыцыі Расеі пагадзілася выканаць рашэньне Эўрапейскага суду ў правах чалавека і выплаціць 3 мільёны эўраў пацярпелым у выніку тэракту ў Беслане. Суд у Страсбуры разгледзеў некалькі скаргаў, пададзеных ініцыятыўнай групай «Маці Бэслану». ЭСПЧ пастанавіў, што расейскія ўлады не справіліся з абавязкам прадухіліць магчымую пагрозу жыцьця людзей і не сплянавалі штурм 3 верасьня 2004 году такім чынам, каб мінімізаваць пагрозу жыцьцям закладнікаў.
Мясцовыя ўлады неаднаразова спрабавалі зьнесьці школу, дзе знаходзіцца мэмарыял. «Маці Бэслану» выступаюць супраць гэтага рашэньня.