Пад ціскам грамадзкай думкі прэзыдэнт Злучаных Штатаў Дональд Трамп распарадзіўся зноў прыспусьціць сьцягі ў памяць сэнатара Джона Маккейна.
Дональд Трамп 27 жніўня выступіў са стрыманай заявай у памяць сэнатара Джона Маккейна і распарадзіўся зноў прыспусьціць сьцяг над Белым домам да дня пахаваньня.
«Нягледзячы на нашыя рознагалосьсі з палітычных прычынаў, я паважаю сэнатара Джона Маккейна за яго службу нашай краіне», — казаў Трамп. У выходныя, пасьля весткі аб сьмерці Маккейна, над Белым домам быў прыспушчаны сьцяг, але ў панядзелак яго зноў паднялі.
Разьвітаньне з Маккейнам пройдзе на гэтым тыдні ў трох гарадах ЗША. Труна зь целам 81-гадовага сэнатара, які памёр у суботу пасьля доўгай барацьбы з анкалягічным захворваньнем, у сераду будзе выстаўленая ў Капітоліі яго роднага штату Арызона, а праз два дні — у ратондзе Капітолію ў Вашынгтоне.
Пасьля суботняй мэмарыяльнай службы ў Нацыянальным катэдральным саборы ў Вашынгтоне, дзе з надмагільнымі прамовамі выступяць экс-прэзыдэнты Барак Абама і Джордж Буш — малодшы, у нядзелю Маккейна пахаваюць на могілках Вайскова-марской акадэміі ў Анапалiсе, штат Мэрылэнд, дзе ён калісьці вучыўся.
Сусьветныя лідэры і калегі Маккейна ў Кангрэсе — як рэспубліканцы, так і дэмакраты — у апошнія дні дзеляцца самымі яскравымі ўспамінамі пра сэнатара, падкрэсьліваючы яго асаблівы статус на сусьветнай арэне. Многія ўспамінаюць яго адважную службу ў ВМС і стойкасьць падчас палону ў Паўночным Віетнаме.
Міністар замежных справаў Віетнаму Фам Бінь Мінь у панядзелак пакінуў запіс у кнізе спачуваньняў у пасольстве ЗША ў Ханоі: «Менавіта ён адыграў лідэрскую ролю ў вылячэньні ранаў вайны і нармалізацыі дачыненьняў паміж ЗША і Віетнамам».
Помнік Маккейну на беразе возера Ханой, дзе ён трапіў у палон у 1967 годзе, пасьля паведамленьняў пра сьмерць сэнатара ператварыўся ў месца паломніцтва: туды прыносяць кветкі, араматычныя палачкі, іншыя памятныя дары.
