Старшыня Менгарвыканкаму Андрэй Шорац па выніках сустрэчы з жыхарамі гораду анансаваў шэраг рашэньняў наконт менскіх вуліцаў Камсамольскай і Рэвалюцыйнай, якія нядаўна сталі пешаходнымі (і якія ў народзе пасьля ліпеньскіх залеваў жартам называюць «суднаходнымі»).
Як піша Minsknews.by, Андрэй Шорац даручыў абавязаць установы, якія знаходзяцца на пешаходных вуліцах, заключыць дамовы на ахову кварталу і дэмантаваць музычныя калёнкі з фасадаў.
«Госьці адной з установаў выходзяць зь віном на вуліцу, стаяць у праезьдзе, — сьцьвярджала жыхарка дому на Камсамольскай Надзея Нянашава. — А калі я спрабавала выехаць з двара, на дах маёй машыны паставілі шкляначку і штурхалі нагамі колы».
Мясцовая жыхарка скардзілася, што музыка «грукоча да 2-й уначы і пазьней», а наведнікі кавярняў, калі тыя зачыняюцца, «перамяшчаюцца на лавачкі пешаходнай вуліцы і працягваюць бяседу там, суправаджаючы весялосьць песьнямі да раніцы».
Таксама Шорац абяцаў узмацніць кантроль за выкананьнем правілаў дарожнага руху (частка пешаходных вуліцаў адгароджаная слупкамі з ланцугамі для руху аўтамабіляў), паставіць шлягбаўмы, каб у двары мелі доступ толькі мясцовыя жыхары.
Як у Менску рыхтаваліся да залевы. ФАТАФАКТ
Раней менчукі патрабавалі пракурорскай праверкі рэканструкцыі пешаходных вуліцаў: у пэтыцыі пыталі, чаму там два шэрагі ліхтарных слупоў, калі даволі аднаго; навошта закуплялі кветніцы на 100 тысяч даляраў, па 1400 даляраў за кожную; чаму пры гэтым ня зроблены якасны вадасьцёк і не правялі абяцанага азеляненьня.
Дырэктар «Менскай спадчыны», што ладзіла рэканструкцыю, адказаў, што ўсё «так прадугладжана праектам».
Пасьля рэканструкцыі вуліцы пачало заліваць у часе дажджоў — мясцовыя жыхары і арандатары памяшканьняў кажуць, што такога раней не было. Вуліца Рэвалюцыйная «паплыла» пасьля першага ж дажджу, супрацоўнікі МНС «прасьвідравалі» ў вадасьцёках злучэньне з каналізацыяй, але вуліцу затоплівала яшчэ двойчы.
Пасьля трэцяй залевы рэканстуяваныя вуліцы, якія жартам ужо празвалі «суднаходнымі», паабяцалі адрамантаваць.
Таксама менчукі патрабавалі «дэкамунізаваных» назваў для пешаходных вуліцаў — прапанову накіравалі ў камісію Менгарвыканкаму па найменьні вуліц, але яна пакуль не дала адказу.