Лінкі ўнівэрсальнага доступу

Свабодны тэатар і гурт «Бумбокс» зладзяць канцэрт «не для гледачоў» на мяжы з Крымам


На фэстывалі Atlas Weekend, што прайшоў 7 ліпеня ў Кіеве, лідэр «Бумбокса» Андрэй Хвыльнюк ужо заклікаў быў падтрымаць зьняволенага ў Расеі Алега Сянцова

Украінскі музычны гурт «Бумбокс» і акторы беларускага Свабоднага тэатру правядуць «негвалтоўную акцыю пратэсту» 19 ліпеня ў падтрымку рэжысэра Алега Сянцова і іншых украінцаў, зьняволеных у Расеі.

Лёзунг канцэрту: «Free Sentsov, Free Crimea».

Канцэрт правядуць каля прапускнога пункту Каланчак на мяжы з акупаваным Расеяй Крымам, на тэрыторыі, кантраляванай украінскімі ўладамі, піша Korrespondent.net. Інфармацыю пацьвердзіў кіраўнік Свабоднага тэатру Мікалай Халезін.

Выступ будзе цягнуцца каля гадзіны і «будзе скіраваны не да гледачоў, а да Крыму — да ўкраінскай зямлі». Яго ладзяць у межах працы над дакумэнтальным фільмам «Зваротны квіток» пра анэксію Крыму. «Бумбокс» і Свабодны тэатар здымаюць гэты фільм пры падтрымцы Міжнароднай асацыяцыі журналістаў.

Жывога эфіру з канцэрту ня будзе, але запіс перададуць вяшчальным кампаніям, сказаў Свабодзе Халезін.

Хто такі Алег Сянцоў?​

Грамадзянін Украіны Алег Сянцоў быў арыштаваны расейскімі акупацыйнымі ўладамі ў Крыме і асуджаны ў Расейскай Фэдэрацыі на 20 гадоў пазбаўленьня волі 25 жніўня 2015 году. Суд прызнаў яго вінаватым у стварэньні ў Крыме тэрарыстычнай групоўкі, кіраваньні ёй, спробе набыць выбуховыя прыстасаваньні і незаконным захоўваньні агнястрэльнай зброі і боепрыпасаў, дзьвюх тэрарыстычных атаках і падрыхтоўцы яшчэ аднаго тэракту.​

Сянцоў сваёй віны на судзе не прызнаў. 14 траўня 2018 году рэжысэр абвясьціў бестэрміновую галадоўку ў калёніі гораду Лабытнангі. Ён патрабуе вызваліць 64 украінскіх палітзьняволеных, але сябе ў гэты сьпіс не ўключыў.

Да Сянцова ў калёнію не пускаюць упаўнаважанага Вярхоўнай Рады па правах чалавека Людмілу Дзянісаву. 5 ліпеня да яго ў калёнію пусьцілі стрыечную сястру Натальлю Каплан, якая паведаміла, што ейны брат вельмі пастарэў і схуднеў на 15 кг. Прэзыдэнт Украіны Пётра Парашэнка з нагоды дня народзінаў Сянцова сказаў, што імя Сянцова працягвае гучаць з усіх міжнародных трыбун.

У Беларусі далучыліся да глябальнай акцыі ў падтрымку палітвязьня Алега Сянцова

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG