Лінкі ўнівэрсальнага доступу

З Марока на Расею. Пачаўся суд за кантрабанду гашышу празь Беларусь


Падсудныя Раман Глінскі (зьлева), Сяргей Альховік (справа)

Дваіх беларусаў меркавана зь міжнароднай злачыннай арганізацыі пачалі судзіць у Горадні 17 ліпеня. Іх абвінавачваюць у правозе празь беларускую мяжу больш як 35 кіляграмаў гашышу.

Падсудныя хаваюць твары

У празрыстай «клетцы» ў залі суду Горадзенскага раёну двое мужчын. Іх ахоўваюць пяцёра канваіраў, некаторыя ў бронекамізэльках.

«Не падыходзьце блізка да клеткі», — рэзка забараняе міліцыянт. Некалькі разоў тое самае нэрвова паўтараюць супрацоўнікі суду.

Падсудныя закрываюць твары ад фотаапаратаў аркушамі паперы. Адзін зь іх не паказвае твар прысутным у залі нават падчас паседжаньня. Яго бачаць толькі судзьдзя, пракурор і адвакаты.

— Вам, напэўна, ня вельмі зручна так трымаць, — дапускае судзьдзя Ганна Ляўсік.

— Там з фотаапаратам... Вось чалавек трымае тэлефон, — кажа фігурант справы пра аднаго з прысутных журналістаў. — Навошта мне гэта трэба?

Мужчына не давярае нават пасьля словаў, што ў залі забаронена здымаць падчас паседжаньня, і працягвае хавацца.

Праз шчылінку паміж паперай і кепкай ён паціху спрабуе разгледзець, хто прыйшоў на суд. Акрамя традыцыйнага складу суду і журналістаў, у залі яшчэ толькі адзін чалавек. Вячаслаў з Расеі. Кажа, што праяжджаў міма і вырашыў завітаць да знаёмага, якога судзяць. Зайшоўшы ў залю, павітаўся кіўком галавы з падсуднымі.

Меўся вазіць расейскае малако ў Беларусь

Першы з абвінавачаных — Сяргей Альховік. Невысокі, у чорнай спартовай куртцы, з-пад кепкі відаць сівыя валасы. Твар за ўвесь час паседжаньня ён так і не адкрыў. Гаворыць нізкім голасам, у гаворцы чуваць расейскія інтанацыі.

Яму 47 гадоў. Нарадзіўся ў Салігорску, па пашпарце жыў у Слуцку. Разьведзены, дачцэ 12 гадоў, сыну 14. Жыве ў незарэгістраваным саюзе. Сярэдняя спэцыяльная адукацыя. На момант затрыманьня быў заснавальнікам расейскай фірмы «Вегаслайф», якая нібыта мелася перавозіць сухое малако з Расеі ў Беларусь. У Беларусі лічыўся беспрацоўным. Раней атрымаў 9 гадоў за сур’ёзны крадзеж.

Маладзейшы фігурант, Раман Глінскі, з пачаткам паседжаньня перастае хавацца ад журналістаў. Ён таксама невысокі, худы, з вузкім вострым тварам, у дыхтоўнай моладзевай куртцы.

Яму 31 год. Нарадзіўся ў Баранавічах. Апошнім часам жыў у Салігорску. Апрача школы нідзе не вучыўся, нежанаты, дзяцей няма, беспрацоўны. На ягоным сумленьні ў мінулым асабліва зламыснае хуліганства.

Пад вартай яны ўжо больш за год.

Ганна Юргілевіч, адвакатка Рамана Глінскага
Ганна Юргілевіч, адвакатка Рамана Глінскага

Пагоршыўся зрок, памяняўся адвакат

Альховік папрасіў у суду час перад допытам, каб азнаёміцца з матэрыяламі справы. Як ён сказаў, у яго пагоршыўся зрок, але акуляраў не было. Партнэрка не перадала, бо не атрымлівала ад яго лістоў. У выніку ён нічога ня змог прачытаць.

Да таго ж адвакатка, зь якой загадзя дамаўляліся на супрацу, наведала яго напярэдадні першага паседжаньня і адмовілася яго абараняць. Новую абаронцу ён убачыў на судзе ўпершыню.

«Мне ж трэба з адвакатам ступень абароны ўзгадніць. Я ня ведаю на сёньняшні дзень, хто мяне абараняе, як мы будзем будаваць нашую абарону», — кажа Альховік.

Ягонае хадайніцтва задаволілі. У судзе зрабілі перапынак да 18 ліпеня.

Гашыш на 700 тысяч даляраў везьлі ў газавым балёне

Фігуранты, паводле матэрыялаў крымінальнай справы, цягам 2016–2017 гадоў перавозілі гашыш з Польшчы і Літвы празь Беларусь у Расею, каб там прадаць іншым кур’ерам. Наркотык прызначаўся для жыхароў Маскоўскай вобласьці.

Летась у чэрвені Глінскага і Альховіка затрымалі каля вёскі Мікелеўшчына Мастоўскага раёну. У машыне была схованка, зробленая з газавага балёна, а там больш за 35 кіляграмаў гашышу.

Схованка ў балёне
Схованка ў балёне

Паводле закону гэта лічыцца буйным памерам. Для параўнаньня, нават 25 грамаў опіюмнага наркотыку — буйны памер. Тут было ў 1400 разоў больш. Кошт затрыманай партыі ацэньваецца ў 700 тысяч даляраў.

Іх абвінавачваюць ва ўдзеле ў злачыннай арганізацыі, незаконным абароце наркатычных сродкаў у буйным памеры арганізаванай групай і незаконным перамяшчэньні наркотыкаў празь мяжу (частка 2 артыкула 285, частка 4 артыкула 328, частка 3 артыкула 328-1 Крымінальнага кодэксу Беларусі). Самы суворы з артыкулаў прадугледжвае да 20 гадоў пазбаўленьня волі.

Кіравалі малдаване і гішпанцы

Беларусы ўваходзілі ў міжнародную злачынную арганізацыю, якой кіравалі малдаване і гішпанцы. Агулам затрымалі больш за 20 ейных удзельнікаў, канфіскавалі больш за 830 кіляграмаў наркатычных рэчываў.

Праваахоўнікі выкрылі транспартную схему: гашыш з Марока перапраўлялі праз мора ў Гішпанію, адтуль у іншыя эўрапейскія краіны і Расею.

Апэрацыя па выяўленьні і ліквідацыі буйнога наркаканала і міжнароднай злачыннай арганізацыі называлася «Пірэнэйскі злом». У ёй прымалі ўдзел сілавікі зь Беларусі, Расеі, Украіны, Польшчы, Літвы, Нямеччыны, Гішпаніі і Марока. Апэрацыю лічаць галоўным антынаркатычным расьсьледаваньнем дзесяцігодзьдзя ў Эўропе.

Арганізацыя складалася з асобных меншых групаў у розных краінах. Вядома, што беларусаў у ёй агулам было дванаццаць.

Ганна Юргілевіч, адвакатка Рамана Глінскага, сказала, што судовы працэс, верагодна, будзе нядоўгі і скончыцца ў жніўні.

18 гадоў за 285 кг гашышу: у Горадні засудзілі расейца за кантрабанду наркотыкаў

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG