Законапраект цалкам можа быць ухвалены не раней за кастрычнік.
Лідэрка руху «Маці 328» пра зьмякчэньне «антынаркатычнага» заканадаўства: Мы не спыняемся
29 чэрвеня Палата прадстаўнікоў у першым чытаньні прыняла зьмены ў некаторыя кодэксы Рэспублікі Беларусь. Яны закранулі і артыкул 328 Крымінальнага кодэксу, які прадугледжвае адказнасьць за распаўсюджаньне і спажываньне наркотыкаў.
У прыватнасьці, дэпутаты пагадзіліся на зьмякчэньне адказнасьці паводле артыкулу 328, дзе ніжняя мяжа пакараньня ў выглядзе пазбаўленьня волі зьмяншаецца з 5 да 3 гадоў, а паводле трэцяй часткі гэтага артыкулу — з 8 да 6.
Законапраект прадстаўляў дырэктар Нацыянальнага цэнтру заканадаўчых і прававых дасьледаваньняў Вадзім Іпатаў. У яго пацікавіліся, якім чынам паўплывае гэты артыкул на тых, хто ўжо адбывае пакараньне за наркотыкі, ці будуць пераглядацца іхныя справы. Вадзім Іпатаў адказаў, што «трэба дачакацца, што ў нас будзе пасьля другога чытаньня».
Яшчэ на адно пытаньне дэпутатаў, ці разглядалася падчас падрыхтоўкі законапраекту магчымасьць умоўна-датэрміновага вызваленьня хоць бы непаўналетніх, дырэктар цэнтру адказаў, што такая магчымасьць не разглядалася. Ён падкрэсьліў, што ў 2-м чытаньні дакумэнт будзе разгледжаны сёлета на асеньняй сэсіі, якая пачынаецца 2 кастрычніка.
Дэпутатка Палаты прадстаўнікоў Ганна Канапацкая заявіла Свабодзе, што сёньня дэпутаты закранулі толькі вяршыню айсбэрга:
«Насамрэч гэта вельмі складаныя працэсы, і тут трэба карэнная перапрацоўка заканадаўства».
Наконт таго, ці змогуць зрабіць гэта да 2-га чытаньня, спадарыня Канапацкая сумняваецца. Дэпутатка шкадуе, што падчас разгляду закону не было зроблена ніякіх зьмякчэньняў для непаўналетніх.
«Працэдуру пакараньня трэба мяняць істотна», — лічыць Канапацкая.
Што важна ведаць:
- У красавіку-траўні актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- 8 траўня Лукашэнка дапусьціў магчымасьць паслабленьняў адказнасьці спажыўцоў наркотыкаў.
- 11 траўня Савет міністраў накіраваў у Палату прадстаўнікоў законапраект аб зьмене наркатычнага артыкулу.
- Што ўрад прапануе зьмяніць у «наркатычных артыкулах» Крымінальнага кодэксу
