Максіма Вінярскага затрымалі 3 ліпеня ў раёне бульвара Талбухіна перад акцыяй Мікалая Статкевіча. Судзілі ж яго за пікетаваньне рэстарацыі «Поедим поедим» — паводле артыкула 23.34 ч.3 («Удзел у несанкцыянаваным масавым мерапрыемстве паўторна на працягу году»). Паседжаньне прайшло ў судзе Менскага раёну.
Абвінавачаньне тычыцца падзеяў 23 чэрвеня каля рэстарана «Поедем поедим». Паводле яго, 23 чэрвеня Вінярскі з 15 да 18 гадзіны прымаў актыўны ўдзел у пікетаваньні, дэманстратыўна перашкаджаў праходу і праезду грамадзян. У абвінавачаньні было зазначана, што пікетаваньне адбывалася з мэтай выяўленьня нязгоды з працай рэстарана.
Вінярскі віну не прызнаў. Паведаміў у паказаньнях, што перашкаджаў праезду аўтатранспарту на тэрыторыю рэстарана.
«Гэта была акцыя прамога дзеяньня. Я супраць, каб называць гэта пікетаваньнем», — заявіў Вінярскі.
Свае дзеяньні ён патлумачыў тым, што лічыць недапушчальнай працу забаўляльнай установы побач з Курапатамі.
Сьведкам выступіў міліцыянт з Бараўлянскага аддзелу міліцыі. Ён паведаміў, што склаў рапарт на падставе апытаньня супрацоўніка рэстарана, які і выклікаў міліцыю. Зь Вінярскім не знаёмы, ня бачыў яго на месцы зьдзяйсьненьня магчымага правапарушэньня, а ягонае прозьвішча даведаўся ад заяўніка.
Пасяджэньне праводзіў судзьдзя Аляксей Крапачоў.
3 ліпеня на бульвары Талбухіна было затрымана каля 30 чалавек. Яны прыйшлі на «Акцыю вызваленьня і салідарнасьці», якую ініцыяваў апазыцыйны палітык Мікалай Статкевіч і якая мелася пачацца ў 13.00. Статкевіч у Фэйсбуку заклікаў людзей сабрацца 3 ліпеня ў сквэры на бульвары, каб «выказаць сваю салідарнасьць з пакаленьнем, якое вызваліла сьвет ад улады Гітлера, і з тымі, хто зараз змагаецца за вызваленьне краіны ад улады яго прыхільніка».
Несанкцыянаваную акцыю спынілі супрацоўнікі міліцыі ў цывільным.
Мікалая Статкевіча затрымалі прыкладна ў 11.30 на выхадзе з дому.
Што важна ведаць: пратэсты супраць новай рэстарацыі ў Курапатах
- Рэстаран «Поедем поедим» у Курапатах меркавана запрацаваў увечары 5 чэрвеня.
- Грамадзкія актывісты штодня ад 31 траўня пікетуюць забаўляльны комплекс, патрабуючы закрыцьця рэстарацыі.
- 1 чэрвеня рэстаран «Поедем поедим» пачаў рэклямавацца ў інтэрнэце.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Адрас рэстарацыі супадае з адрасам ТАА «Амізбел», якое было створана кампаніяй «Белноватэкс груп». Апошняя валодае шэрагам фэшэнэбэльных рэстаранаў у Менску.
- Рэстарацыя стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- Будоўля забаўляльнага комплексу пад назвай «Бульбаш-хол» пачалася ў 2010 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
