Дэлегацыя беларускай апазыцыі праводзіць сустрэчы ў МЗС і Сэйме Польшчы — без арыштаванага ў Менску старшыні Партыі БНФ Рыгора Кастусёва.
Сёньня ў міжнароднай камісіі Сэйму Польшчы пройдуць слуханьні па сытуацыі ў Беларусі. Адзін з запрошаных старшыня Партыі БНФ Рыгор Кастусёў ня трапіў на сустрэчы ў Варшаву — ён паехаў у аэрапорт «Менск», але быў затрыманы міліцыяй і зьмешчаны ў ізалятар часовага ўтрыманьня Менскага раёну. Цяпер чакаецца суд над ім, верагодна, за пікет у Курапатах супраць рэстарацыі «Поедем поедим».
Як паведаміў Свабодзе адзін з удзельнікаў сустрэч у Варшаве старшыня Руху «За Свабоду» Юрась Губарэвіч, намесьнік міністра замежных спраў Польшчы Барташ Ціхоцкі сказаў беларускім апазыцыянэрам, што рэакцыя Польшчы на арышт запрошанага ў Варшаву палітыка будзе, цяпер у МЗС думаюць над яе формай.
