27 чэрвеня суд Савецкага раёну ў Гомлі вынес прысуд па крымінальнай справе, фігуранты якой — былыя работнікі ААТ «Гомельпрамбуд». Прарабы і забесьпячэнец абвінавачваліся ў службовым падлогу, крадзяжах шляхам злоўжываньня службовымі паўнамоцтвамі, паведамляе БелаПАН.
Слуханьні праходзілі ў закрытым рэжыме паводле хадайніцтва адвакатаў. Абаронцы спасылаліся на тое, што будуць агучвацца матэрыялы, якія праходзяць з грыфам «для службовага карыстаньня» і не прызначаныя для апублікаваньня. Гаворка пра дакумэнтацыю, якая тычыцца Беларускай АЭС у Астраўцы. Будаўнічыя працы на аб’екце выконваў «Гомельпрамбуд».
Паводле вэрсіі сьледзтва, прарабы і забесьпячэнец сьпісвалі матэрыяльныя каштоўнасьці і раскрадалі будаўнічыя матэрыялы. Кошт стратаў перавысіў 36 тысяч рублёў. Махінацыі на аб’екце выявіў Камітэт дзяржкантролю.
Як стала вядома БелаПАН, суд прысудзіў абвінавачаных (чатыры чалавекі) да розных тэрмінаў пазбаўленьня волі (ад 3 да 5 гадоў) з адтэрміноўкай выкананьня пакараньня.
Беларуская АЭС узводзіцца пад Астраўцом на Горадзеншчыне за расейскі крэдыт. Для Беларускай АЭС выбраны праект АЭС-2006 — тыпавы расейскі праект атамнай станцыі з выкарыстаньнем рэактара ВВЭР-1200.
Першая пастаўка ядзернага паліва чакаецца ў канцы 2018 году. Увод у эксплюатацыю першага энэргаблёка заплянаваны на 2019 год (на 1 год перанесены, плянаваўся ў 2018-м), другога — на 2020 год.
