На перадвыбарным мітынгу ў горадзе Булаваё прагрымеў выбух, некалькі чалавек пацярпелі. Афіцыйных дадзеных пра колькасьць параненых няма. На мітынгу з прамовай выступаў дзейны прэзыдэнт Зімбабвэ Эмэрсын Мнангагва.
У выніку выбуху пацярпела жонка віцэ-прэзыдэнта краіны Мэрэй Чывенга.
На фота, апублікаваных у мясцовых СМІ, відаць, што раненьні атрымалі яшчэ некалькі чалавек.
Як паведамілі сьведкі, выбух прагрымеў побач з VIP-тэнтам, пацярпелі некалькі чыноўнікаў і функцыянэраў кіруючай партыі, а таксама ахова. Прэзыдэнт краіны пад узмоцненай аховай неадкладна пакінуў мітынг і схаваўся ў дзяржаўнай рэзыдэнцыі.
Выбары ў Зімбабвэ павінны адбыцца 30 ліпеня. На пасаду прэзыдэнта прэтэндуюць тры кандыдаты: Эмэрсан Мнангагва, які выконвае абавязкі кіраўніка краіны пасьля адстаўкі яго папярэдніка Робэрта Мугабэ, кіраўнік апазыцыйнай партыі Нэльсан Чаміза і кіраўнік Кааліцыі дэмакратаў Элтан Мангомы. Сацыёлягі прагназуюць, што ніводзін з палітыкаў ня зможа перамагчы ў першым туры.
У лістападзе 2017 году ў Зімбабвэ адбыўся ваенны пераварот. Сілавікі захапілі палац прэзыдэнта краіны 93-гадовага Робэрта Мугабэ і яго жонку Грэйс. Мугабэ адрокся ад улады. Новым кіраўніком дзяржавы стаў Эмэрсан Мнангагва, якога Мугабэ звольніў незадоўга да перавароту за праяву «прыкмет неляяльнасьці».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў