Лінкі ўнівэрсальнага доступу

Кіраўнік БАЖ: «Справа супраць Ліпая нагадвае справу Бяляцкага»


Андрэй Бастунец

Старшыня Беларускай асацыяцыі журналістаў Андрэй Бастунец пракамэнтаваў інфармацыю Камітэту дзяржаўнага кантролю адносна пачатку крымінальнай справы супраць дырэктара БелаПАН Алеся Ліпая, якога вінавацяць у нясплаце падаткаў на 173 тысячы рублёў.

Дырэктара БелаПАН Ліпая абвінавацілі ў нясплаце падаткаў на 173 тысячы рублёў

Андрэй Бастунец зьвяртае ўвагу на два моманты, якія тычацца справы супраць Алеся Ліпая.

«Па-першае, тое, што сама справа і яе фармулёўка вельмі нагадвае справу Алеся Бяляцкага. Бо там тое самае было ў абвінавачаньні. Па-другое, што тычыцца дзеяньняў, якія зрабіў Алесь, — я думаю, гэта пэўным чынам супярэчыць дзеяньням, якія праводзілі сьледчыя. Але мне цяжка тут нешта камэнтаваць, будзем чакаць далейшага разьвіцьця падзеяў», — сказаў Андрэй Бастунец.

Якім можа быць гэтае далейшае разьвіцьцё падзеяў? Бастунец лічыць, што «самым розным».

«Пачынаючы ад таго, што будзе спыненая крымінальная справа, калі сьледзтва сьцьвярджае, што былі выплачаныя падаткі. І заканчваючы тым, што будзе ісьці разьвіцьцё падзеяў у непажаданым кірунку», — сказаў старшыня БАЖ.

БАЖ і праваабарончыя арганізацыі чакаюць «больш поўнай інфармацыі, каб рэагаваць адэкватна».

Ліпая адпусьцілі, БелаПАН працягвае працаваць

У 17.30 БелаПАН паведаміў, што Алеся Ліпая выпусьцілі пасьля допыту.
У агенцтве Свабодзе паведамілі, што кампанія працягвае працу, але камэнтаваць выстаўленыя дырэктару абвінавачаньні адмовіліся.

Ператрус цягнуўся больш за 6 гадзін

Паводле БелаПАН, прадстаўнікі ДФР прыйшлі ў кватэру Ліпая 14 чэрвеня каля 7.00. Ліпай адразу ж зьвязаўся з праваабаронцам Алесем Бяляцкім і да яго прыходу не адчыняў дзьверы. Вобшук пачаўся прыкладна ў 8.00.

У 14:35 заснавальніка і кіраўніка агенцтва БелаПАН праваахоўнікі вывелі зь ягонай кватэры.

​З кватэры Ліпая праваахоўнікі выносілі аргтэхніку.

Падабенства са справай лідэраў прафсаюзу РЭП і Бяляцкім

10 траўня старшыні незалежнага прафсаюзу работнікаў радыёэлектроннай прамысловасьці (РЭП) Генадзю Фядынічу і кіраўніку менскай арганізацыі Ігару Комліку выставілі абвінавачаньні ва «ўхіленьні ад сплаты падаткаў у асабліва буйным памеры» (ч. 2 арт. 243 КК), за што пагражае абмежаваньне волі на тэрмін да 5 гадоў або пазбаўленьне волі на тэрмін ад 3 да 7 гадоў з магчымай канфіскацыяй маёмасьці.

Паводле такога самага артыкула ў 2011 годзе пасадзілі старшыню праваабарончага цэнтру «Вясна» Алеся Бяляцкага — асудзілі на 4,5 года калёніі ўзмоцненага рэжыму і канфіскацыю маёмасьці, але вызвалілі праз тры гады. Беларускія, эўрапейскія і амэрыканскія праваабаронцы прызналі Бяляцкага палітвязьнем, прысуд быў названы палітычна матываваным.

* * *

Алесь Ліпай — заснавальнік і кіраўнік БелаПАН, найстарэйшага незалежнага інфармацыйнага агенцтва ў Беларусі, якое працуе ад 1991 году. Сябра Саюзу беларускіх пісьменьнікаў і Беларускага ПЭН-цэнтру. Першую кнігу паэзіі «Пад сьнегам» выдаў у 2000 годзе. У 2007 годзе выйшаў зборнік паэзіі «Рэшта».

Нарадзіўся ў 1966 годзе ў вёсцы Андросаўшчына Капыльскага раёну. У 1988 годзе, падчас вучобы на факультэце журналістыкі БДУ, перасьледаваўся за ўдзел у вырабе самвыдатаўскай насьценгазэты «Лірнік». Напрыканцы 1980-х гадоў — удзельнік Таварыства маладых літаратараў «Тутэйшыя».

У 1988 годзе стаў першым карэспандэнтам Радыё Свабода ў Беларусі.

Алесь Ліпай, заснавальнік і кіраўнік БелаПАН на «Сьвяце незалежнасьці» ў Менску, 25 сакавіка 2018 году
Алесь Ліпай, заснавальнік і кіраўнік БелаПАН на «Сьвяце незалежнасьці» ў Менску, 25 сакавіка 2018 году

У 1991 годзе, цягам працы ў газэце «Знамя юности», вёў беларускамоўную старонку «Родны склон». Аўтар перакладу на беларускую мову Дамовы аб вывадзе ядзернай зброі зь Беларусі. На пачатку 1990-х гадоў арганізаваў перавозку ў Беларусь больш як тысячы кніг, выдадзеных беларускай дыяспарай у Нямеччыне, і распаўсюдзіў іх па школах ды бібліятэках.

У чэрвені 1996 году, падчас апэрацыі па вызваленьні дзяцей, узятых у закладнікі тэрарыстам у дзіцячым садку ў Менску, браў інтэрвію ў тэрарыста, адцягваючы тым самым ягоную ўвагу.

У 2004 годзе БелаПАН быў уганараваны прэміяй імя Дзьмітрыя Завадзкага — «За мужнасьць і прафэсіяналізм», як «пацьвярджэньне бездакорнай рэпутацыі БелаПАН і прызнаньне высокага прафэсіяналізму журналістаў». У 2005 годзе інфармацыйная кампанія БелаПАН была названая ляўрэатам прэміі імя Герда Буцэрыюса «Маладая прэса Ўсходняй Эўропы». У 2006 годзе БелаПАН і ягоная інтэрнет-газэта Naviny.by атрымалі «Прэмію Рунэта» — у намінацыі «Рунэт за межамі Ru».

На мяжы 2014 і 2015 гадоў невядомыя блякавалі сайты БелаПАН і Naviny.by, а таксама шэрагу іншых недзяржаўных рэсурсаў. За атакі ніхто ня ўзяў на сябе адказнасьці і не назваў прычынаў, але БелаПАН мяркуе, што прычынай атакі стаў артыкул пра «Малітву за Беларусь».

БелаПАН быў генэральным партнэрам менскага мітынгу-канцэрту «Сьвята Незалежнасьці», прысьвечанага 100-й гадавіне абвяшчэньня незалежнасьці Беларускай Народнай Рэспублікі. Ліпай выступаў на сьвяце, сярод іншага заклікаў да салідарнасьці з затрыманымі з палітычных прычын, зачытаў верш Уладзімера Някляева, які той напісаў за кратамі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG