Лінкі ўнівэрсальнага доступу

Падзеі 10 чэрвеня ў беларускай і сусьветнай гісторыі.

Дата дня

10 чэрвеня 1812 году ў Полацку адкрылася езуіцкая акадэмія — першая вышэйшая навучальная ўстанова на тэрыторыі сучаснай Беларусі. Полацкая езуіцкая акадэмія дзейнічала да 1820 году.

Полацкая езуіцкая акадэмія. Малюнак Напалеона Орды
Полацкая езуіцкая акадэмія. Малюнак Напалеона Орды

Таксама ў гэты дзень

1562 — з друкарні ў Нясьвіжы выйшла першая кніга беларускага асьветніка Сымона Буднага Катэхізіс.

«Катэхізіс» Сымона Буднага
«Катэхізіс» Сымона Буднага

1925 — пастановаю Савету народных камісараў БССР Янку Купалу прысвоілі званьне народнага паэта Беларусі ў сувязі з 20-годзьдзем ягонай творчай дзейнасьці. Купала стаў першым афіцыйна прызнаным народным паэтам.

1940 — падчас Другой ўсясьветнай вайны Італія абвясьціла вайну Францыі ды Вялікабрытаніі.

1947 — кампанія «Сааб» выпусьціла свой першы аўтамабіль.

2008 — з аўкцыёну прадалі пісьменьніцкі дом адпачынку Іслач у Валожынскім раёне. Папярэдне Вярхоўны суд за «парушэньні статутнай дзейнасьці» зьліквідаваў Беларускі літаратурны фонд, які распараджаўся санаторыем.

2009 — падчас расейска-беларускай малочнай вайны на тэрыторыі Расеі забаранілі ўвоз практычна ўсёй беларускай малочнай прадкцыі. Галоўны санітарны ўрач Расеі Генадзь Анішчанка абвясьціў пра сьпіс забаронаў 6 чэрвеня, а 9 чэрвеня яго дапоўніў. З гандлёвых сетак Расейскай Фэдэрацыі пачалі здымаць малочныя вырабы беларускай вытворчасьці, а ў Беларусі вернутае малако вылівалі ў сянажныя вежы.

Гомельскі мясакамбінат: прадукцыя, у якой у Расеі знайшлі чуму сьвіней, туды не пастаўлялася

У гэты дзень нарадзіліся

1723 – Францішак Папроцкі, езуіт, філёзаф і асьветнік, адзін з выдаўцоў віленскіх «Палітычных каляндароў», заснавальнік, выдавец і рэдактар штотыднёвіка «Літоўскі кур’ер».

1883 – у Будславе нарадзіўся Язэп Гапановіч, нацыянальны дзяяч, прадпрымальнік.

1936 – Вячаслаў Кебіч, беларускі палітык, першы прэм’ер-міністар Рэспублікі Беларусь у пэрыяд з 1990 па 1994 год.

«Шчасьлівым чалавекам я адчуваў сябе двойчы ў жыцьці: калі быў студэнтам і калі працаваў дырэктарам заводу».

З мэмуараў Вячаслава Кебіча «Спакуса ўладай».

Вячаслаў Кебіч падае два пальцы Аляксандру Лукашэнку ў часе рэгістрацыі кандыдатаў у прэзыдэнты, 31 траўня 1994 г. Фота з газэты "Свабода"
Вячаслаў Кебіч падае два пальцы Аляксандру Лукашэнку ў часе рэгістрацыі кандыдатаў у прэзыдэнты, 31 траўня 1994 г. Фота з газэты "Свабода"

​1977 – Віктар Ганчарэнка, футбаліст, трэнэр футбольнага клюбу БАТЭ ў 2004-2013 гадах. Ад 2016 году працуе ў расейскім ЦСКА, з камандай якой двойчы ўзяў срэбра расейскага чэмпіянату, дайшоў да чвэрцьфіналу Лігі Эўропы.

Віктар Ганчарэнка на пасадзе трэнэра БАТЭ, 2008 год
Віктар Ганчарэнка на пасадзе трэнэра БАТЭ, 2008 год

Віктар Ганчарэнка расказаў, як правільна называць яго і ягоную краіну

У памяці

1923 – Міхал Федароўскі, фальклярыст, этнограф, археоляг, калекцыянэр.

1982 – Ян Садоўскі, навуковец, скарыназнаўца, дзяяч беларускай эміграцыі ў Вялікабрытаніі і Канадзе.

2010 – Пётр Маланачкін, грамадзкі актывіст з Горак, ініцыятар збору подпісаў супраць будаўніцтва беларускай атамнай электрастанцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG