Злучаныя Штаты заклікаюць улады Ўкраіны дзейнічаць законна падчас ператрусаў у сродках масавай інфармацыі і адначасова разумеюць занепакоенасьць краінаў сьвету «інтэнсіўнай прапагандай» з боку Расеі.
Пра гэта 15 траўня заявіла прэс-сакратарка Дзярждэпартамэнту ЗША Гэзэр Наўэрт, камэнтуючы ператрусы ў офісе і ў журналістаў «РИА Новости — Украина».
«Арышты журналістаў або ператрусы ў сродках інфармацыі, калі гэта адбываецца, павінны вырашацца ў адпаведнасьці з законам. Гэта тое, што прадугледжвае міжнароднае права ў галіне правоў чалавека», — сказала прэс-сакратарка.
«Мы разумеем, што Ўкраіна, як і многія іншыя краіны, занепакоеная інтэнсіўнай прапагандай. Мы размаўляем з многімі нашымі саюзьнікамі і партнэрамі за мяжой, яны сталі ахвярамі і разумеюць уплыў і ахоп расейскай прапаганды. Таму мы разумеем, што гэта выклікае трывогу ва Ўкраіне», — дадала Наўэрт.
Раней 15 траўня прадстаўнік АБСЭ па свабодзе СМІ Арлем Дэзір выказаў занепакоенасьць падзеямі ў Кіеве. Ён адзначыў, што «барацьба з прапагандай не павінна супярэчыць міжнародным стандартам і ня мусіць уяўляць сабой непрапарцыйнае ўмяшальніцтва ў дзейнасьць сродкаў масавай інфармацыі».
Раніцай 15 траўня Служба бясьпекі Ўкраіны правяла ператрусы ў офісе «РИА Новости — Украина». Прэс-сакратар СБУ Алена Гітлянская паведаміла пра затрыманьне кіраўніка агенцтва Кірылы Вышынскага, пасьля было абвешчана, што яго падазраюць у дзяржаўнай здрадзе.
У СБУ паведамілі, што раскрылі дзейнасьць сеткі мэдыяструктураў, падкантрольных Расеі, «выкарыстоўваліся краінай-агрэсарам у рамках гібрыднай інфармацыйнай вайны супраць Украіны».
«РИА Новости — Украина», якое зьяўляецца аддзяленьнем расейскага дзяржаўнага навіннага агенцтва «РИА Новости», працуе ва Ўкраіне ня менш за шэсьць гадоў.
