Падзеі 8 траўня ў беларускай і сусьветнай гісторыі.
Анонс
8 траўня ў партугальскім Лісабоне адбудзецца першы паўфінал музычнага конкурсу «Эўравізія-2018». Беларусь пад нумарам 8 прадставіць украінскі сьпявак Мікіта Аляксееў (ALEKSEEV). За час удзелу Беларусі ў Эўравізіі ўпершыню краіну на конкурсе прадстаўляе іншаземец. Песьня Аляксеева «Forever» 17 лютага перамагла ў фінале нацыянальнага адбору.
Раней беларускія ўдзельнікі адбору патрабавалі дыскваліфікаваць Мікіту Аляксеева, кажучы, што ягоная песьня парушае правілы конкурсу, бо была прадстаўленая задоўга да адбору. У камандзе сьпевака такія абвінавачаньні адпрэчваюць.
«Я беларускі сьпявак». Хто такі ALEKSEEV, які прадставіць Беларусь на Эўравізіі
Свабода ART будзе камэнтаваць выступы канкурсантаў у твітэры. Падпісвайцеся, каб не прапусьціць выступ прадстаўніка Беларусі.
Дата дня
8 траўня 1945 году быў падпісаны акт аб капітуляцыі Нямеччыны. Такім чынам скончылася Другая сусьветная вайна ў Эўропе.
Таксама ў гэты дзень
1674 — каралём Рэчы Паспалітай і вялікім князем ВКЛ быў абраны Ян Сабескі.
1984 — Савецкі Саюз абвясьціў пра байкот Алімпійскіх гульняў у Лос-Анджэлесе, ЗША.
1989 — выйшаў першы нумар польскай «Gazety Wyborczej» як органа незалежнага прафсаюзу „Салідарнасьць“.
1993 — утворана Таварыства вольных літаратараў.
1999 — у Менску камандзір СОБР Дзьмітры Паўлічэнка вярнуў начальніку турмы Алегу Алкаеву расстрэльны пісталет. У сваім рапарце начальнік крымінальнага вышуку генэрал Мікалай Лапацік выказаў меркаваньне, што з гэтага пісталета быў забіты зьніклы напярэдадні экс-міністар унутраных справаў Юры Захаранка.
У гэты дзень нарадзіліся
1883 — Сьцяпан Некрашэвіч, мовазнавец, незалежніцкі дзяяч, прадстаўнік Ураду БНР ва Ўкраіне, першы старшыня Інстытуту беларускае культуры, акадэмік АН Беларусі, аўтар акадэмічных слоўнікаў. Расстраляны НКВД у 1937-м.
1937 — Лявон Шыманец, шматгадовы старшыня Згуртаваньня беларусаў Францыі «Хаўрус», брат Івонкі Сурвілы.
У памяці
1551 — памерла Барбара Радзівіл, вялікая княгіня літоўская, каралева польская.
1880 — памёр францускі пісьменьнік Гюстаў Флябэр.
