Лінкі ўнівэрсальнага доступу

«Далікатнае пытаньне». Прадстаўнік МЗС Украіны пракамэнтаваў магчымы абмен «шпіёнамі» зь Беларусьсю


Уладзімір Шкуроў (Володимир Шкуров)

Уладзімер Шкуроў, дырэктар Другога эўрапейскага дэпартамэнту Міністэрства замежных спраў Украіны, адказаў на пытаньне Свабоды пра магчымы абмен абвінавачанымі ў шпіянажы грамадзянамі Ўкраіны і Беларусі.

— Ці абмяркоўваюць афіцыйныя ўлады дзьвюх краін пытаньне абмену «шпіёнамі»?

— Гэта вельмі важнае, але далікатнае пытаньне. Вядома, абмяркоўваюць, і я спадзяюся, што застаецца зусім няшмат часу, каб гэтае пытаньне было вырашана.

— Калі вы кажаце пра вырашэньне пытаньня, гаворка ідзе пра абмен?

— Я не хацеў бы казаць больш, бо гэта трохі за межамі маёй кампэтэнцыі. Я назіраю за гэтым пытаньнем, я бяру ўдзел у адпаведных нарадах, і мы вельмі б хацелі, каб з гуманітарнага пункту гледжаньня гэта было вырашана як найхутчэй. Ёсьць мноства тэхнічных пытаньняў, мноства юрыдычна-прававых пытаньняў.

— Сярод юрыдычных пытаньняў ёсьць і той аспэкт, што беларускі «шпіён» яшчэ ня мае прысуду?

— Я ня думаю, што менавіта так трэба трактаваць. Ёсьць тэхнічныя пытаньні, якія зараз паступова вырашаюцца. І я спадзяюся, бо і родныя, і людзі, якія трапілі ў гэтую сытуацыю, таксама не павінны думаць, што іхныя дзьве дзяржавы пра іх забыліся. Працуюць службы, якія мусяць працаваць. Кіраўніцтва пра гэта ведае, і ёсьць такое агульнае жаданьне, каб хутчэй гэтае пытаньне ўрэгуляваць. Гэта шчыра.

Гісторыя шпіёнскага скандалу

Юры Палітыка ў судзе, люты 2018-га
Юры Палітыка ў судзе, люты 2018-га

Беларускага грамадзяніна Юрыя Паліты́ку затрымалі ў чэрвені 2017 году на ўкраінскім памежным пераходзе «Новыя Ярылавічы», што на мяжы зь Беларусьсю. Падчас затрыманьня ў ягоным тэлефоне быў знойдзены зашыфраваны файл з мапаю разьмяшчэньня вайсковых падразьдзяленьняў у зоне антытэрарыстычнай апэрацыі на Данбасе і плянам наступальнай апэрацыі «Шторм».

Паўгода да затрыманьня спэцслужбы Ўкраіны сачылі за ўсімі кантактамі і перамяшчэньнямі Юрыя Палітыкі ў Чарнігаве. Справа супраць беларуса была адкрытая на падставе заявы вайскоўца Дзьмітрыя Острыка, які цяпер знаходзіцца ў зоне антытэрарыстычнай апэрацыі на Данбасе. Паводле Юрыя Палітыкі, ён пазнаёміўся зь Дзьмітрыем Острыкам у грамадзкай арганізацыі «Поўнач», якая дапамагала памежнікам ахоўваць дзяржаўную мяжу Ўкраіны. Беларус хацеў працаваць валянтэрам у гэтай арганізацыі. Цяпер у Чарнігаве ідзе суд над Палітыкам, наступнае пасяджэньне заплянаванае на 15 траўня.

Паўло Шаройка
Паўло Шаройка

Карэспандэнт Грамадзкай нацыянальнай тэлерадыёкампаніі Ўкраіны Паўло Шаройка быў затрыманы супрацоўнікамі КДБ Беларусі 25 кастрычніка 2017 году ў Менску і абвінавачаны ў стварэньні ў Беларусі шпіёнскай сеткі зь ліку грамадзян краіны, «якія за грашовае ўзнагароджаньне выконвалі ягоныя заданьні па зьбіраньні зьвестак выведнага характару ў вайскова-палітычнай сфэры».

У дачыненьні да Шаройкі была заведзеная крымінальная справа паводле 358 артыкула Крымінальнага кодэксу — за шпіянаж.

Суд над Шаройкам прайшоў у Вярхоўным судзе Беларусі ў лютым, вырак не апублікаваны дагэтуль. Шаройка застаецца ў Беларусі пад вартай.

Украінскія экспэрты выказвалі меркаваньні, што ўкраінскі журналіст Паўло Шаройка быў затрыманы ў Беларусі ў адказ менавіта на затрыманьне Юрыя Палітыкі ў Чарнігаве.

Старшыня КДБ заявіў аб выяўленьні шпіёна ў Генэральным штабе. І паказаў лыжаролеры

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG