Лінкі ўнівэрсальнага доступу

Рэдактару сайту «Народныя Навіны Віцебска» пагражае судом адна з гераінь ягонага фатаздымка


Сяргей Серабро

9 красавіка на сайце «Народныя Навіны Віцебска» зьявіўся артыкул пра паводку на Дзьвіне. Апроч тэксту, у матэрыяле былі і фатаздымкі, якія зрабіў Сяргей Серабро. Адна зь дзяўчат, якая трапіла ў кадар, напісала скаргу ў міліцыю, заявіўшы пра «парушэньне таямніцы прыватнага жыцьця». Ідзе разбор.

Сяргей Серабро кажа, што прэтэнзіі да фатаздымка з трыма дзяўчатамі пачаліся пасьля таго, як артыкул быў перадрукаваны адной зь віцебскіх суполак «Укантакце».

«Частка камэнтароў да артыкула пра ўзровень вады ў Дзьвіне была прысьвечана зьнешнасьці дзяўчат, якія трапілі на здымак. Мяне, уласна, зацікавіў элемэнт краявіду — падтоплены вадой парапэт, на якім яны стаялі. Дарэчы, дзяўчаты выдатна бачылі, што я фатаграфую, і прэтэнзій у іх не было. Усё гэта я патлумачыў участковаму Кастрычніцкага РАУС Максіму Бабахіну. Ён даў мне падпісацца пра тое, што са мной праведзена «прафіляктычная гутарка», — сказаў Свабодзе Сяргей Серабро.

Як яму стала вядома, заяву ў міліцыю паводле артыкула 179 «Незаконнае зьбіраньне або распаўсюд інфармацыі пра прыватнае жыцьцё» напісала адна з выпадковых «мадэляў». Спачатку яна тэлефанавала аўтару фатаздымка і патрабавала яго выдаліць, аднак аўтар ня бачыць для гэтага падстаў. У тым ліку таму, што артыкул перадрукавалі іншыя інтэрнэт-рэсурсы, і фота даўно гуляе па сеціве.

Спадар Серабро — рэдактар і заснавальнік сайту «Народныя Навіны Віцебска». Падобных выпадкаў за амаль 12-гадовую гісторыю рэсурсу ён прыгадаць ня можа. І перакананы, што нічога не парушаў, а ўсяго толькі сфатаграфаваў віцебскі краявід разам з жыхарамі гораду, якія апынуліся ў кадры.

Такой самай думкі прытрымліваецца і юрыст ГА БАЖ Алег Агееў.

«Безумоўна, у журналіста ёсьць абавязак атрымліваць згоду фізычных асоб на правядзеньне аўдыё- і відэазапісу, кіна- і фатаздымкаў. Але — за выключэньнем іх правядзеньня ў месцах, адкрытых для масавага наведваньня, падчас масавых мерапрыемстваў. Мяркуючы па дадзеным фатаздымку, ён якраз і зроблены ў публічным месцы», — сказаў юрыст.

Алег Агееў падкрэсьлівае, што разьмешчаны на сайце фатаздымак ніяк не ідэнтыфікуе асоб, якія на ім выяўленыя. Тым болей не раскрывае ніякай таямніцы іх асабістага жыцьця. Таму і падстаў для прыцягненьня да крымінальнай адказнасьці няма.

Падводныя камяні новага закону аб СМІ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG