Былы дырэктар ФБР Джэймс Комі заявіў, што прэзыдэнт ЗША Дональд Трамп «маральна непрыдатны» для пасады, якую займае. Заявы Комі былі зробленыя ў вялікім інтэрвію тэлекампаніі ABC, 15 красавіка, якое трансьлявалася напярэдадні выхаду мэмуараў былога дырэктара ФБР «Вышэйшая ляяльнасьць: праўда, хлусьня і лідэрства». У кнізе ён падрабязна распавядае пра свае стасункі з прэзыдэнтам.
«Думаю, ён маральна непрыдатны для таго, каб быць прэзыдэнтам», — сказаў Комі ў сваім першым тэлевізійным інтэрвію, дадзеным з таго часу, як у траўні Трамп звольніў яго. Комі — былы фэдэральны пракурор, крытыкаваў тое, як Трамп «расказвае пра жанчын і ставіцца да іх, як да кавалкаў мяса». Ён сказаў, што Трамп «пастаянна хлусіць аб вялікіх і малых справах і настойвае на тым, што амэрыканцы гэтаму вераць».
Заявы Комі сталі апошнім актам вайны словаў паміж ім і Трампам, які раней у той жа дзень назваў Комі «брудным пляткаром» і сказаў, што той павінен быць заключаны ў турму. У сваёй кнізе Комі піша, што Трамп нагадвае яму несумленнага боса мафіі, якога рухае ягонае эга, і кажа, што прэзыдэнт запатрабаваў ад яго асабістага абяцаньня ляяльнасьці, што Трамп адмаўляе.
«Я ніколі не прасіў яго аб асабістай ляяльнасьці. Я нават ня ведаў гэтага хлопца. Яшчэ адна яго шматлікая хлусьня. Яго "запіскі "- гэта самаабслугоўваньне і фэйк!» — напісаў Трамп ў сэрыі твітаў, 15 красавіка, перш чым інтэрвію Комі выйшла ў эфір.