Лінкі ўнівэрсальнага доступу

Лукашэнка абяцаў за суткі папярэдзіць Украіну, калі Расея будзе нападаць празь Беларусь, — Турчынаў


Аляксандар Турчынаў з Аляксандрам і ММікалаем Лукашэнкамі ў Кіеве 7 чэрвеня 2014 году

Сакратар Рады нацыянальнай бясьпекі і абароны Ўкраіны Аляксандар Турчынаў, які адразу пасьля ўцёкаў былога ўкраінскага прэзыдэнта Віктара Януковіча выконваў абавязкі кіраўніка дзяржавы, упершыню распавёў некаторыя падрабязнасьці сваёй першай сустрэчы ў гэтай якасьці з прэзыдэнтам Беларусі Аляксандрам Лукашэнкам 29 сакавіка 2014 году.

У прыватнасьці, ён пракамэнтаваў дэталі рашэньняў, што ўхваляліся на дзяржаўным узроўні адразу пасьля анэксіі Расеяй Крыму. Ён таксама расказаў пра паводзіны расейскай арміі ў непасрэднай блізкасьці ад мяжы з Украінай.

«Дзесьці на пачатку сакавіка (2014 году — РС) наша адноўленая выведка паведамляе дакладны час ўварваньня расейскіх войскаў. Умоўна кажучы, заўтра а чацьвертай раніцы на Чарнігава-Кіеўскім і Харкаўскім кірунках... Мы ўсе ноччу на камандным пункце, войскі ў акопах... Дакладваюць: «Расейскія танкі рухаюцца ў напрамку нашай мяжы!» Танкі падыходзілі досыць блізка, але потым заварочвалі назад. Надышла раніца, затым — дзень. Наступу няма. На наступны дзень аналягічны даклад — і зноў а чацьвертай раніцы. Тая ж сытуацыя — наступу няма. Калі мне далажылі аб уварваньні трэці раз, я папрасіў кіраўніка выведкі: «Добра, хай наступаюць, але толькі не а чацьвертай раніцы! Давайце хаця б гадзіне а восьмай-дзявятай. Тры дні бяз сну я ня вытрымаю», — сказаў Аляксандар Турчынаў у інтэрвію ўкраінскаму Інтэрнэт-выданьню «Гардон».

Аляксандар Турчынаў мяркуе, што такім чынам Расея сьвядома правакавала Ўкраіну.

«Цяпер можна на гэтую тэму жартаваць, а тады было не да жартаў. Мабілізацыя толькі рыхтуецца. Усе хоць трохі "жывыя" вайсковыя часткі я даў каманду перакінуць з захаду краіны на поўнач і ўсход для стварэньня там абаронных рубяжоў. Войскаў не хапае перакрыць асабліва небясьпечныя кірункі магчымага наступу. Рэзэрваў няма. Каб скараціць колькасьць магчымых напрамкаў удару, я выехаў у Беларусь на сустрэчу з прэзыдэнтам Лукашэнкам. Ён паабяцаў, што з тэрыторыі яго краіны расейцы нас атакаваць ня будуць. Але калі мы разьвітваліся, ён сказаў: "Але ў крайнім выпадку я папярэджу за суткі...". Я быў удзячны і за гэта», — распавёў сакратар Рады нацбясьпекі і абароны Ўкраіны.

Сустрэча Аляксандра Лукашэнкі і Аляксандра Турчынава, што праходзіла 29 сакавіка 2014 году ў прэзыдэнцкай рэзыдэнцыі ў вёсцы Ляскавічы на мяжы з Украінай, працягвалася больш як тры гадзіны. Тады паводле афіцыйных паведамленьняў двух бакоў, галоўнай тэмай перамоў называлася двухбаковае супрацоўніцтва.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG