2018 год у Магілёве пройдзе пад знакам юбілею Беларускай Народнай Рэспублікі. Пра гэта заявілі прадстаўнікі грамадзкіх і палітычных арганізацый гораду, якія на працягу некалькіх месяцаў рыхтавалі сьвяточныя імпрэзы. 15 сакавіка на прэсавай канфэрэнцыі працоўная група расказала пра іх.
У плянах актывістаў
- зладзіць разам з магілёўскімі гісторыкамі экскурсію па гарадзкіх мясьцінах, зьвязаных з БНР,
- арганізаваць сьвяточны канцэрт,
- зрабіць відэаролік пра ўтварэньне БНР,
- надрукаваць тэматычныя каляндарыкі,
- правесьці публічныя лекцыі пра фармаваньне і дзейнасьць Магілёўскага Беларускага камітэту.
Цягам году працоўная група плянуе ўсталяваць на доме, у якім 31 сакавіка 1918 году магілёўцы прызналі ўладу БНР, памятны знак.
Вырабіць шыльду гатовы скульптар Андрэй Вераб’ёў. У тэлефоннай гутарцы з карэспандэнтам Свабоды ён сказаў, што перакананы — улада ня будзе супраць увекавечваньня 100-гадовага юбілею БНР.
«Калі ў Менску дазволілі ўсталяваць памятную дошку, то чаму ў Магілёве будуць супраць?» — сказаў ён.
Магілёўскі гарвыканкам выказаў гатоўнасьць спрыяць правядзеньню круглага стала, прысьвечанага гісторыі БНР, у адным зь мясцовых унівэрсытэтаў.
Разам з тым у афіцыйным адказе, падпісаным намесьніцай старшыні гарвыканкаму Алай Галушкай, ня згадваецца яшчэ адна ініцыятыва прадстаўнікоў грамадзкасьці — арганізаваць сумесна з уладай урачысты канцэрт. Яго працоўная група вырашыла правесьці ў грамадзкім цэнтры «Кола», бо на іншыя пляцоўкі, як вынікала з тлумачэньняў старшыні Алега Дзьячкова, няма рэсурсаў. Паводле яго, грошы на імпрэзы зьбіраюцца талакою.
На 25 сакавіка заплянаваны інфармацыйны пікет да Дня Волі. Яго зьбіраюцца правесьці ў цэнтры гораду. З заяўкай па дазвол у гарвыканкам зьвярнуліся Аляксандар Сілкоў з руху «За свабоду» і Алег Аксёнаў з аргкамітэту партыі «Беларуская хрысьціянская дэмакратыя». Адказу ад чыноўнікаў пакуль няма.
Як у Магілёве падтрымалі незалежнасьць Беларусі. Гісторыя першай беларускай арганізацыі гораду
