Лінкі ўнівэрсальнага доступу

Словы Пуціна пра «найноўшыя ракеты» ілюстраваныя кадрамі 2007 году


Падчас прамовы прэзыдэнта Расеі Ўладзіміра Пуціна пра новую ядзерную зброю краіны быў выкарыстаны кампутарны ролік адзінаццацігадовай даўніны.

Кадры, на якіх намаляваны аддзел галаўной часткі балістычнай ракеты «Сатана», выкарыстоўвалі ў праграме «Ударная сіла» на Першым канале ў выпуску «Цар-ракета» 25 верасьня 2007 году.

У выступе Пуціна кадры з гэтага відэа выкарыстоўвалі для ілюстрацыі «новага ракетнага комплексу зь цяжкай міжкантынэнтальнай ракетай» пад назвай «Сармат».

Акрамя гэтага, СМІ зьвярнулі ўвагу, што ядзерная ракета ў роліку Першага каналу паражае амэрыканскі горад Сэнт-Пітэрсбэрг у штаце Фларыда. Брытанская газэта Daily Star піша, што Фларыда — адно з улюблёных месцаў адпачынку прэзыдэнта ЗША Дональда Трампа.

У сваім пасланьні да Фэдэральнага сходу Пуцін заявіў, што Расея неўзабаве прыме на ўзбраеньне найноўшыя ядзерныя ракеты, якія змогуць пераадольваць амэрыканскую сыстэму ПРА. Выступленьне прэзыдэнта суправаджалася як відэаролікамі, так і кампутарнай графікай з выявай запускаў ракет і прынцыпу іх дзеяньня.

Зброі была прысьвечаная амаль палова выступу прэзыдэнта. Як сьцьвярджае Пуцін, Злучаныя Штаты ў аднабаковым парадку адмаўляліся весьці з Расеяй перамовы аб супрацьракетнай абароне. «Нас ніхто ня слухаў. Паслухайце цяпер», — заявіў расейскі лідэр, распавядаючы пра новыя віды зброі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG